ஓசூர் அருகே சிப்காட் அமைக்க எதிர்ப்பு: 3-வது நாளாக விவசாயிகள் உண்ணாவிரதம்

ஓசூர்: ஓசூர் அருகே சிப்காட் அமைக்க எதிர்ப்பு தெரிவித்து விவசாயிகள் 3-வது நாளாக உண்ணாவிரதப் போராட்டத்தில் ஈடுபட்டனர்.

ஓசூர் அருகே உத்தனப்பள்ளி, நாகமங்கலம், அயர்னப்பள்ளி ஆகிய ஊராட்சிகளில் 3,034 ஏக்கர் நிலப்பரப்பில் 5-வது சிப்காட் அமைக்க விளை நிலங்களைக் கையகப்படுத்தும் பணி நடைபெற உள்ளது. இதற்கு அப்பகுதி விவசாயிகள் எதிர்ப்பு தெரிவித்து உத்தனப்பள்ளி வருவாய் ஆய்வாளர் அலுவலகம் முன்பு காத்திருப்புப் போராட்டத்தில் ஈடுபட்டு வருகின்றனர்.

இந்நிலையில், கடந்த 5-ம் தேதி முதல் 20-க்கும் மேற்பட்ட விவசாயிகள் சாகும்வரை உண்ணாவிரதப் போராட்டத்தில் ஈடுபட்டுள்ளனர். நேற்று 154-வது நாளாக காத்திருப்புப் போராட்டமும், 3-வது நாளாக உண்ணாவிரதப் போராட்டமும் நடந்தது. விவசாயிகளின் உடல்நிலையைச் செவிலியர்கள் அவ்வப்போது பரிசோதனை செய்து வருகின் றனர்.

அதேபோல, வருவாய்த் துறை அதிகாரிகளும் விவசாயிகளை மீண்டும் பேச்சு வார்த்தை நடத்த அழைப்பு விடுத்துள்ளனர்.