‘விரைவில் வருகிறது’ என்று ஒரு திரைப்படத்தின் சுவரொட்டி தியேட்டரின் வெளிச்சுவரில் ஒட்டப்பட்டதுமே மக்களுக்குப் பரபரப்பு தொற்றிக் கொள்ளும். அதிலும் சம்பந்தப்பட்ட ரசிகப் பெருமக்களுக்குக் காய்ச்சலே வந்துவிடும். அந்தச் சுவரொட்டிகளில் படங்கள்கூட இருக்காது. படத்தின் பெயர் மட்டும் அழகான டிசைனில் எழுத்துகளாக இருக்கும். அந்த டிசைனையே மக்கள் கடக்கும் போதெல்லாம் நின்று பார்த்துப் பேசிக் கொண்டிருப்பார்கள்.
சமயத்தில் அந்த ‘வருகிறது' போஸ்டர் ஒட்டிய படம் குறிப்பிட்ட தியேட்டரில் வராமலேகூடப் போகும். திரையரங்கினுள் இடைவேளையின்போது படத்துடன் `வருகிறது’ ஸ்லைடும் போடுவார்கள். அதைப் பார்க்கவே ரசிகர்கள், வேறு என்ன குப்பைப்படம் ஓடிக் கொண்டிருந்தாலும் போவார்கள்.