கோவைக்கு பெருமை சேர்க்கும் பல்வேறு தொழில்களில் முக்கியமானது வெட்கிரைண்டர் உற்பத்தி. 1950-ம் ஆண்டு தொடங்கப்பட்ட இந்தத் தொழில், 75 ஆண்டுகளைக் கடந்துள்ளது. கோவையின் அடையாளமாகத் திகழும் வெட்கிரைண்டர்களுக்கு மத்திய அரசின் புவிசார் குறியீடு வழங்கப்பட்டுள்ளது. சுமார் 700 தொழிற்சாலைகள் வெட்கிரைண்டர் உற்பத்தியில் ஈடுபட்டுள்ளன. இதுதவிர ஆயிரத்துக்கும் மேற்பட்ட குறு, சிறு மற்றும் நடுத்தர நிறுவனங்கள் இத்துறைக்கு தேவையான உதிரிபாக உற்பத்தியில் ஈடுபட்டுள்ளன.
கோவையில் தற்போது வழக்கமான பழைய வகை (1 முதல் 40 லிட்டர்), சாய்க்கக் கூடியது (டில்டிங்) (2 முதல் 40 லிட்டர்) மற்றும் டேபிள் டாப் (2 மற்றும் 3 லிட்டர்) ஆகியவை உற்பத்தி செய்யப்படுகின்றன. இந்தத் தொழில் கணிசமான வளர்ச்சி அடைந்திருந்தாலும், மூலப்பொருள் விலை உயர்வு, ஜிஎஸ்டி உள்ளிட்ட நெருக்கடியை சந்தித்து வருவதாக இத்துறை சார்ந்தவர்கள் கூறுகின்றனர்.