காலநிலை மாற்றத்தைக் குறைக்கவும், புதைபடிவ எரிபொருட்களைத் (Fossil Fuels) தவிர்க்கவும் உலகம் முழுவதும் மின்சார வாகனங்களின் பயன்பாடு அதிகரித்து வருகிறது.
இதில் ஒரு புரட்சிகரமான முயற்சியாக, ‘நகரும்போதே மின்னேற்றம் செய்யும்’ (Dynamic Charging) தொழில்நுட்பத்தில் ஸ்வீடன் உலகத்துக்கே முன்னோடியாகத் திகழ்கிறது. அந்த வரிசையில், ஸ்டாக்ஹோம் நகருக்கு அருகில் உள்ள இரோடு அர்லாண்டா (eRoadArlanda) திட்டம் உலகளாவிய கவனத்தைப் பெற்றுள்ளது.
இது ஒரு 2 கிலோமீட்டர் நீளமுள்ள மின்சாரச் சாலை. அர்லாண்டா சரக்கு முனையத்துக்கும் ரோசர்ஸ்பெர்க் தளவாடப் பகுதிக்கும் இடையே இந்தச் சாலை அமைக்கப்பட்டுள்ளது. இது சாதாரண சாலைகளைப் போலன்றி, சாலையின் நடுவே ஒரு சிறிய மின்சாரத் தடம் (Rail) பதிக்கப்பட்டிருக்கும்.
இந்தச் சாலையில் செல்லும் வாகனங்களின் அடிப்பகுதியில் ஒரு நகரக்கூடிய கை (Movable Arm) பொருத்தப்பட்டிருக்கும். வாகனம் தண்டவாளத்தின் மேல் வரும்போது, அந்தச் சென்சார் தானாகவே அதைக் கண்டறிந்து தண்டவாளத்துடன் இணையும்.