மெக்டொனால்ட்ஸ் இந்தியாவில் மட்டும் சைவம் ஏன்?

உலகம் முழுவதும் செயல்படும் முன்னணி துரித உணவு நிறுவனங்களில் ஒன்று மெக்டொனால்ட்ஸ் (McDonald's). இந்நிறுவனத்துக்கு இந்தியா உட்பட 119 நாடுகளில் 40 ஆயிரத்துக்கும் மேற்பட்ட கிளைகள் உள்ளன.இந்த பிராண்ட் பர்கர், பிரெஞ்ச் ப்ரைஸ் ஆகிய உணவு வகைகளுக்கு பெயர் பெற்றது. அத்துடன் உள்ளூர் மக்களின் சுவை மற்றும் பாரம்பரியங்களுக்கு ஏற்பவும் உணவுப் பொருட்களை தயாரித்து வழங்குவதுதான் இந்நிறுவனத்தின் சிறப்பு..இந்தியாவில் 'மெக்ஸ்பைஸி பனீர்' (McSpicy Paneer), ஜப்பானில் 'டெரியாக்கி பர்கர்' (Teriyaki Burger) என ஒவ்வொரு நாட்டிலும் அதன் சுவை மற்றும் கலாச்சார விருப்பங்களுக்கு ஏற்ப தனிப்பட்ட உணவு வகைகள் வழங்கப்படுகின்றன.இந்தியாவில் மட்டும் 500-க்கும் மேற்பட்ட மெக்டொனால்ட்ஸ் உணவகங்கள் பலவிதமான உணவுகளை வழங்குகின்றன. இதில் சிறப்பு என்னவென்றால், உலகம் முழுவதும் உள்ள கிளைகளில் அசைவ உணவு வகைகள் மட்டுமே பரிமாறப்படும் நிலையில், இந்தியாவில் செயல்படும் 4 கிளைகளில் சைவ உணவு வகைகள் மட்டுமே வழங்கப்படுகின்றன. இங்கு மெனுவிலும் சமையலறையிலும் இறைச்சியின் சுவடு கூட இல்லை. இந்த உணவகங்கள், பெரும்பாலும் மத நம்பிக்கைகளுக்கு மதிப்பு அளிக்கும் வகையில் தொடங்கப்பட்டவை ஆகும்..இந்தியாவில் மட்டும் சுத்த சைவம் ஏன்? - இந்தியாவில் உள்ள சைவ மெக்டொனால்ட்ஸ் கிளைகளில் மூன்று, பிரபல யாத்திரைத் தலங்களுக்கு அருகில் அமைந்துள்ளன. அந்த இடங்களுக்கு வரும் பக்தர்கள் பெரும்பாலும் கடுமையான சைவ உணவுமுறையை பின்பற்றுவதால், அவர்களின் உணர்வுகளுடன் ஒத்துப்போகும் வகையில் மெக்டொனால்ட்ஸ் அங்கு சுத்த சைவ உணவகங்களை அமைத்தது. அசைவ உணவுக்கான வாய்ப்பே இல்லாததால் யாத்ரிகர்கள் எந்த தயக்கமும் இல்லாமல் தங்கள் உணவை ருசிக்க முடிகிறது. இந்த 100% சைவ மெக்டொனால்ட்ஸ் உணவகங்கள் எங்கு உள்ளன என்பது பற்றி பார்ப்போம்.1 குருஷேத்திரம், ஹரியானா: உலகின் முதல் சுத்த சைவ மெக்டொனால்ட்ஸ் உணவகம் இதுதான். இந்த உணவகம் தொடக்கத்தில் அசைவ உணவுகளை வழங்கியது. இந்நிலையில், அசைவ உணவுக்கு நகராட்சி நிர்வாகம் தடை விதித்தது. இதன் காரணமாக சைவத்துக்கு மாறியது..2 அமிர்தசரஸ், பஞ்சாப்: சீக்கியர்களின் கோயிலான தங்க கோயிலில் இருந்து 200 மீட்டர் தொலைவில் இந்த உணவகம் அமைந்துள்ளது. கடந்த 2013-ம் ஆண்டு தொடங்கப்பட்டது. கோயிலைச் சுற்றி உள்ள பகுதியில் அசைவ உணவு விற்கக் கூடாது என்ற சீக்கியர்களின் மரபை மதிக்கும் வகையில் சைவமாக செயல்படுகிறது. இங்கு சைவ பர்கர், காய்கறி எண்ணெயில் பொறிக்கப்பட்ட பிரெஞ்ச் ப்ரைஸ், பானங்கள் கிடைக்கின்றன. தொடக்கத்திலிருந்தே சைவமாக செயல்படும் முதல் மெக்டொனால்ட்ஸ் கிளை இதுதான்.3 நியூ ட்ராக்-டாராகோட் மார்க், ஜம்மு காஷ்மீர்: வைஷ்ணவ தேவி கோயிலுக்கு செல்லும் பக்தர்களுக்காக கடந்த 2023-ம் ஆண்டு இங்கு மெக்டொனால்ட்ஸ் சைவ உணவகம் திறக்கப்பட்டது. இதில் மற்றொரு சிறப்பு என்னவென்றால், உள்ளூர் மக்களின் உணவுப் பழக்கத்துக்கு ஏற்ப வெங்காயம், பூண்டு ஆகியவையும் உணவில் சேர்க்கப்படுவதில்லை. அங்கு பக்தர்கள் சுவையான உணவை விரைவாக சுயமாக வாங்கிக் கொள்ள ஏதுவாக இயந்திரம் பொருத்தப்பட்டுள்ளது..4 அர்த்குவரி, ஜம்மு காஷ்மீர்: இந்த கிளையும் வைஷ்ணவ தேவி கோயிலுக்கு செல்லும் பக்தர்களுக்காக அர்த்குவரி என்ற இடத்தில் 2023-ல் திறக்கப்பட்டது. இங்கு உட்கார்ந்து சாப்பிடும் வசதி இல்லை. குறிப்பாக, பார்சல் வாங்கிச் செல்ல விரும்பும் பக்தர்களுக்கு முன்னுரிமை அளிக்கப்படுகிறது. இங்கும் வெங்காயம், பூண்டு சேர்க்காமல் உணவு தயாரிக்கப்படுகிறது.