தூங்கும் போதும் உங்கள் வருமானம் பெருக வேண்டுமா?

நம் எல்லோருக்குமே நம் வேலை தவிர்த்து, கூடுதலாக வருவாய் ஈட்ட ஆசைதான். இதைத்தான் ‘பாசிவ் இன்கம்’ (Passive Income) என்று குறிப்பிடுகிறார்கள். ‘பாசிவ் இன்கம்’ என்றால் தமிழில் ‘செயலற்ற வருமானம்' என்று பொருள். அதாவது நாம் சேர்த்து வைத்திருக்கக் கூடிய பணமே, கூடுதல் பணத்தை ஈட்டித்தர வேண்டும் - நம் உடல் உழைப்பு எதுவும் இல்லாமல். இன்னும் சொல்லப்போனால், நாம் தூங்குகிற போதும் நமது வருமானம் பெருகிக்கொண்டே இருக்க வேண்டும்.

சரி,இந்தப் ‘பாசிவ் இன்கம்’ எனப்படும் கூடுதல் வருமானத்தை ஈட்டுவது எப்படி?

5 வழிகள்

1) நாம் சேர்த்து வைத்த பணத்தை பீரோவில் பூட்டி வைக்காமல் அல்லது வங்கி சேமிப்புக் கணக்கில் வைத்துக் கொள்ளாமல், பிக்சட் டெபாசிட்டில் முதலீடு செய்தால் வருடத்திற்கு 5% - 8% வரை வருமானம் கிடைக்கும். தபால் அலுவலகங்கள், சிறு நிதி வங்கிகளில் கூடுதல் வட்டி கிடைப்பதற்கும் வாய்ப்புள்ளது. அதே பணத்தை பெனிபிட் ஃபண்ட், கார்ப்பரேட் நிறுவனங்களில் டெபாசிட் செய்தால், 9% -12% வருவாய் கிடைக்கும். ஆனால் ரிஸ்க் சற்று அதிகம்.

2) மியூச்சுவல் ஃபண்டில் முதலீடு செய்தால், பங்குச் சந்தை ஏற்ற இறக்கங்களைப் பொறுத்து 10% - 25% வரை வருமானம் ஈட்டலாம். ஆனால், இது நீண்ட கால நோக்கிலான முதலீடு. பங்குச் சந்தை முதலீடுகள் கடந்த 30 வருடங்களில் 15% வருவாய் தந்துள்ளதாக புள்ளி விவரம் கூறுகிறது.

3) கார்ப்பரேட் நிறுவனங்களில் பிக்சட் டெபாசிட்டாக முதலீடு செய்யாமல், அதன் பங்குகளில் முதலீடு செய்தால் வருடாந்திர டிவிடெண்ட் கிடைப்பதற்கும் வாய்ப்பு உள்ளது. ஆனால், இதில் ரிஸ்க் உண்டு.

4) இன்சூரன்ஸ் திட்டங்களில் முதலீடு செய்தால், முதல் மாத முடிவிலிருந்தே மாதாந்திர வருவாய் கிடைப்பதற்கான திட்டங்கள் தற்போது வந்து விட்டன. திட்டங்களைப் பொருத்து வருமான விகிதம் மாறும்.ஆனாலும், குறைந்தபட்ச வருமானம் உத்திரவாதமாகக் கிடைக்கும்.

5) உங்கள் வீட்டு மொட்டை மாடி காலியாக இருந்தால் மாடியில் ஒரு ஷெட் போட்டு டியூஷன் சென்டருக்கோ, யோகா சென்டருக்கோ வாடகைக்கு விடலாம். காலி மனை இருந்தால், சிறிதளவு முதலீடு செய்து கார் பார்க்கிங் அல்லது குடோனுக்காக வாடகைக்கு விடலாம். அதேபோன்று, வாகனங்களில் ஆர்வம் இருக்குமானால், கார் அல்லது சரக்கு வாகனங்களை வாங்கி வாடகைக்கு விட்டு வருமானம் ஈட்டலாம்.

நீங்கள் மாத வருவாய்க்காக ஓடுவது ஒருபுறம் இருக்க, இது போன்ற கூடுதல் வருமானம் ஈட்டும் போதுதான் உங்களின் சேமிப்பு அதிகரிக்கும். அவசர காலங்களிலும் அது கை கொடுக்கும். எனவே கூடுதல் வருவாயில் கவனம் செலுத்துங்கள். வாழ்க்கையை வளமாக்குங்கள்.