நீரிழிவு நோய் வராமல் தடுக்க

‘நீரிழிவு' எனும் பெயர் இந்த நோயின் அறிகுறிகளுள் ஒன்றான அதிகமான சிறுநீர் கழித்தலைக் குறிக்கிறது. ஆனால், அந்த நோய்க்கு நிறைய அறிகுறிகள் உள்ளன. இந்த அறிகுறிகளைப் புறக்கணிக்கக் கூடாது.முக்கிய அறிகுறிகள்1. அதிகமாகப் பசித்து, அடிக்கடி உணவு/நொறுவை சாப்பிட்டு உடல் பருமனாவதும், பிறகு சில நாள்கள் கழித்து உடல் மெலிதலும்..2. அதிக தாகம் ஏற்பட்டு நீர் அருந்திக்கொண்டே இருப்பது, இதனால் அடிக்கடி சிறுநீர் கழிப்பது, குறிப்பாக இரவு உறக்கத்திலிருந்து எழுந்து அடிக்கடி சிறுநீர் கழிப்பது.3. ஆண், பெண் இருவருக்கும் ரத்த குளுக்கோஸ் அளவுகள் வரம்பு மீறி இருக்கும்போது அவர்களின் இனப்பெருக்க உறுப்புகளில் பூஞ்சைத் தொற்று / பாக்டீரியத் தொற்றுகள் அடிக்கடி ஏற்படும்..ஆண்களின் இனப்பெருக்க உறுப்பின் முன் தோலில் வெடிப்பு ஏற்பட்டு அதில் கிருமித் தொற்று ஏற்படும். பெண் களுக்கு அடிக்கடி வெள்ளைப்படுதல் நீரிழிவின் அறிகுறியாக இருக்கலாம். எந்த அறிகுறியும் இல்லாமலும் பலருக்கு நீரிழிவு இருப்பது கண்டறியப்படுகிறது என்பதையும் மனதில்கொள்ள வேண்டும். விழிப்புணர்வு* ஒவ்வொரு நீரிழிவு நோயாளி வீட்டிலும் சுயமாக ரத்த குளுக்கோஸ் பரிசோதனை செய்துகொள்ளும் ‘குளுக்கோமீட்டர்’ இருக்க வேண்டும். அதை வைத்துச் சுயமாகப் பரிசோதனை செய்துகொள்ள வேண்டும். * வாரம் இரண்டு நாள்கள் (எந்த இரண்டு நாள்களாகவும் இருக்கலாம்) காலை வெறும் வயிற்றில், காலை உணவுக்குப் பிறகு, மதிய உணவுக்கு முன், மதிய உணவுக்கு இரண்டு மணிநேரத்துக்குப் பிறகு, இரவு உணவுக்கு முன், இரவு உணவுக்குப் பிறகு ( 2 மணிநேரம் கழித்து) என ஆறு முறை ரத்தப் பரிசோதனை செய்து பார்ப்பது நல்லது. * மாதம் ஒருமுறை கட்டாயம் மருத்துவரிடம் நேரடியாகச் சென்று இந்தப் பரி சோதனைகளைக் காட்டி சிகிச்சையை மாற்றிக்கொள்ள வேண்டும். * சுய கண்காணிப்பும் மருத்து வக் கண்காணிப்பும் நீரிழிவு நோய் கட்டுப்பாட்டின் இரண்டு கண்கள்.* 30 - 40 வயதில் கண்டறியப்படும் நீரிழிவைக் கட்டுப்பாட்டுக்குள் வைக்காவிட்டால், அதன் மோசமான தாக்கம் 50 - 60 வயதுகளில் தெரியும். * நீரிழிவு நோய் உடலில் உள்ள ரத்த நாளங்களின் உள்புறச் சுவரான ‘எண்டோதீலி ய’த்தைப் பாதிக்கிறது. இது எண்டோ தீலியத்தில், இன்ஃபிளமேஷன் எனும் உள்காயங்களை உண்டாக்குகிறது.* மூளை, கண்கள், சிறுநீர கங்கள், கல்லீரல், இதயம், நுரையீரல் ஆகிய உறுப்புகள் முதல் நுண்ணிய நரம்புகள்வரை அனைத்துக்கும் ஊட்டமளிப்பவை ரத்த நாளங்கள்தான். இவற்றில் பாதிப்பை ஏற்படுத்தி விரைவில் ரத்த நாள அடைப்பு ஏற்படுத்தி ரத்த ஓட்டத்தைக் குறைப்பதால் ஏற்படும் பாதிப்பால் சிறுநீரக அழற்சி, கல்லீரல் அழற்சி, விழிப்படல அழற்சி, இதய ரத்த நாள அடைப்பு, நரம்பு மண்டல அழற்சி, மூளை ரத்த நாள அடைப்பு போன்ற பிரச்சினைகளைச் சந்திக்க வேண்டியுள்ளது.* நீரிழிவைக் கட்டுக்குள் வைக்க உணவு, உடற்பயிற்சி, உறக்கம், உள நலம் ஆகிய நான்கையும் சரியாகப் பராமரிக்க வேண்டும். * உணவைப் பொறுத்தவரை மாவுச்சத்து எனும் கார்போஹைட்ரேட் நிரம்பிய உணவு, குறிப்பாகத் தானிய உணவைக் கட்டுக்குள் வைக்க வேண்டும். உணவுத் தட்டை நான்கு பகுதிகளாகப் பிரித்து முதல் பகுதியில் அரிசி, கோதுமை, சிறுதானியங்கள் ஆகிய மாவுச்சத்து நிறைந்த உணவு, இரண்டாம் பகுதியில் காய்கறி களும், மூன்றாவது பகுதியில் புரதச்சத்துமிக்க முட்டை, கோழி இறைச்சி, ஆட்டிறைச்சி, மீன், பனீர், சோயா, டோஃபு ஆகியவையும், நான்காவது சிறிய பகுதியில் இனிப்புச் சுவையற்ற வெள்ளரிப்பிஞ்சு, கொய்யா காய், நெல்லிக்காய் எனப் பிரித்து உண்ணலாம். * இனிப்புச் சுவை கொண்ட அனைத்து உணவு, வாழைப்பழம், மாதுளை, ஆப்பிள் உள்ளிட்ட பழங் களைச் சாப்பிடாமல் இருப்பது நல்லது. * புரதம் / நல்ல கொழுப்பு நிறைந்த உணவை அச்சமின்றி உண்ணலாம். பாதாம் பருப்பு, நிலக்கடலை, சுண்டல், பாசிப்பயறு, தேங்காய், கொய்யா, வெள்ளரி, முட்டை போன்றவை நீரிழிவு நோயாளிகளுக்குச் சிறந்த நொறுவைகள். * தினசரி ஒரு மணிநேரம் நடைப் பயிற்சி செய்தல் நலம். இதனால், ரத்த குளுக்கோஸ் அளவு கட்டுப்பாட்டுக்கு வரும். எலும்பு போர்த்திய தசைகள் வலிமை அடையும்போது, ரத்த குளுக்கோஸை அவை உணவாக உட்கொள்கின்றன. இதனால் இன்சுலின் சிறப்பாகச் செயல்படத் தொடங்குகிறது. எனவே, நடையை ஒருபோதும் நிறுத்தக் கூடாது. கொஞ்சமோ அதிகமோ தினசரி நடைக்கு நேரம் ஒதுக்க வேண்டும். அடுத்த கட்டமாக, தசைகளை வலுப் படுத்தும் பயிற்சிகளை மேற்கொண்டு, தசைகளை வலுக்கூட்டுவது இன்னும் சிறப்பானது. * உடற்பயிற்சிக்கு அடுத்தபடியாக எட்டு மணிநேர உறக்கம். தினமும் ஒரே நேரத்தில் தூங்கி ஒரே நேரத்தில் எழுவது முக்கியம். உதாரணமாக, இரவு 10 - 6 மணிக்கு உறங்கி விழிப்பது சிறந்தது. ஆழ்ந்த அமைதியான நல்ல உறக்கம் நீரிழிவைக் கட்டுப்படுத்த முக்கியத் தேவை. பல நேரம் நல்ல உறக்கம் இல்லாதபோது, நீரிழிவுக் கட்டுப்பாட்டில் சிக்கலை ஏற்படுத்தும். இரவு ஒன்பது மணிக்கு மேல் திறன்பேசியில் நேரத்தைச் செலவிடுவது நல்லதல்ல. உறங்கும் இடத்தை இருள் சூழ்ந்ததாகவும் அமைதியானதாகவும் பராமரிக்க வேண்டும். நல்ல உறக்கம் மனிதரின் கட்டாயத் தேவைகளுள் ஒன்று. இறுதியாக, மிக முக்கியம் உள நலன். தினமும் மனம் பதற்றத்துடன் இருந்தால், அது உடலின் மீது ஆதிக்கம் செலுத்தி, எப்போதும் உடல் ‘அலர்ட்’ நிலையில் இருக்கும். இதனால், கார்டிசால் ஹார்மோன் அதிகம் சுரந்து, ரத்த குளுக்கோஸ் கட்டுப்பாட்டில் பாதிப்பை ஏற்படுத்தும்.தியானம், ஆன்மிகம், யோகா, இசை, ஓவியம் வரைதல், பாடுதல், எழுதுதல், படித்தல், நண்பர்களுடன் அளவளாவுதல் போன்ற மனம் விரும்பும் விஷயங்களில் தினசரி ஒரு மணிநேரமாவது கழிப்பதன் மூலம் மனதை அமைதியாக வைத்துக்கொள்ள முயல வேண்டும். மனப்பதற்றம், அச்சம், மன அமைதி யின்மை ஆகியவை தொடர்ந்தால் முறையான, அறிவியல்ரீதியாக நிரூபணமான மனநல மருத்துவச் சிகிச்சையை எடுத்துக்கொள்ளத் தயங்கக் கூடாது. இன்று வாழும் மக்களில் நீரிழிவு கண்டறியப்பட்டவர்கள், நீரிழிவு கண்ட றியப்பட இருக்கிறவர்கள் என்று இரண்டு வகையாக இருக்கின்றனர். அதாவது, தற்போது வாழும் வாழ்க்கை முறை, அதிக மாவுச்சத்து உண்ணும் உணவு முறை, உடல் உழைப்பற்ற வாழ்க்கை முறை, மன அழுத்தம் மிகுந்த - உறக்கத்துக்கு முக்கியத்துவம் குறைந்துபோன வாழ்க்கை போன்றவற்றால் அனை வருக்குமே நீரிழிவு அபாயம் மிக அதிகம் இருக்கிறது. தெற்காசியாவில் நம் அனைவரின் மரபணுக்களும் நீரிழிவுக்குச் சாதகமானவையும்கூட. எனவே, நீரிழிவு குறித்து விழிப்புணர்வு பெற்ற சமூகமாக நாம் மாற வேண்டும். இயன்ற அளவு வாழ்க்கை முறை மாற்றங்களைப் புகுத்தி நீரிழிவு எனும் நோய், நமக்கும் அடுத்த சந்ததிக்கும் வராமல் பாதுகாப்பது சிறந்தது. நீரிழிவை நோயே இல்லை, அதற்கு மருந்து மாத்திரை, சிகிச்சை அவசியம் இல்லை என்று கருதுவது உங்கள் உடலுக்கும் உயிருக்கும் குடும்பத்துக்கும் பாதகம் விளைவிக்கும். - கட்டுரையாளர், பொது நல மருத்துவர்; drfarookab@gmail.com

நீரிழிவு நோய் வராமல் தடுக்க

அதிகம் வாசித்தவை...