மேஜிக்... மேஜிக்...இடம் மாறும் மந்திர பென்சில்

குழந்தைகளே, ஒவ்வொரு வாரமும் குட்டி மேஜிக்குகளைப் பார்த்து வருகிறோம் அல்லவா? இந்த வாரம் அதிசயப் பென்சில் மேஜிக் செய்து பார்த்துப் பழகுவோமா?

என்னென்ன தேவை?

சுண்டு விரல் அளவுக்கு இரண்டு பென்சில்கள்

மேஜிக்:

# இரண்டு குட்டிப் பென்சில்களை மேஜையின் மீது வையுங்கள்.

# வலது பக்க பென்சில் மீது வலது கையையும், இடது பக்க பென்சில் மீது இடது கையையும் வையுங்கள். பின்னர் கைகளைத் திருப்பிப் பென்சில்கள் மீது வையுங்கள்.

# இப்போது, வலது பக்க பென்சிலை இடது கையில் எடுத்து விரல்களுக்குள் மூடிக்கொள்ளுங்கள். இடது பக்கம் இருக்கும் பென்சிலை வலது கையில் எடுத்து மூடிவைத்துக் கொள்ளுங்கள்.

# இப்போது மேஜிக் மந்திரத்தைச் சொல்லி இரண்டு கைகளையும் திறந்தால், இடது கையில் இருந்த பென்சில் வலது கைக்கு மாறியிருக்கும். இரண்டு பென்சில்களும் ஒரே கையில் இருக்கும்.

மேஜிக் ரகசியம்

# நீங்கள் பென்சில்களை வெவ்வேறு கைகளுக்கு மாற்றினீர்கள் அல்லவா? அப்போது பென்சிலை வலது கையால் எடுத்து இடது கையில் வைப்பது போலப் பாவனை மட்டுமே செய்ய வேண்டும்.

# இடது கையில் பென்சிலை வைப்பதுபோலப் பாவனை மட்டுமே செய்து, வலது கையிலேயே வைத்துக்கொண்டு, உடனே கையை மூடிக்கொள்ள வேண்டும்.

# பின்னர் வலது கையால் மற்றொரு பென்சிலை எடுத்துக் கையை மூடி, மேஜிக் மந்திரத்தைச் சொல்ல வேண்டும்.

# கைகளைத் திறக்கும்போது, வலது கையில் இரண்டு பென்சில்களும் இருக்கும். இடது கை காலியாக இருக்கும். இதுவே மேஜிக் பென்சிலின் ரகசியம்.

இந்த மேஜிக்கை பலமுறை செய்து பார்த்துப் பயிற்சி எடுத்தால், எளிதாகச் செய்துவிடலாம்.