குழந்தைப் பாடல்: திருவிழா

திருவிழாவாம் திருவிழா!

தேரிழுக்கும் திருவிழா!

ஒருமுகமாய் மக்களெல்லாம்

ஒன்று கூடும் திருவிழா.

பட்டு ஆடை உடுத்தலாம்;

பாட்டி கையைப் பிடிக்கலாம்;

கொட்டு மேளம் கேட்டதும்

குடுகுடென்று ஓடலாம்.

ஆனை, குதிரை பார்க்கலாம்;

அதிர் வேட்டுக் கேட்கலாம்.

சேனை போல யாவரும்

திரண்டு கூடிச் செல்லலாம்.

தேரில் சாமி வந்ததும்

தேங்காயோடு போகலாம்.

ஊராரோடு நாமுமே

உடைத்து வைத்து வணங்கலாம்.