இரண்டாம் சகாப்தம்! - ஏவி.எம்.சரவணன் | அஞ்சலி

ஆணும் பெண்ணும் முழுமையான பாலினச் சமத்துவத்துடன் சுதந்திர இந்தியாவில் எவ்வாறு வாழ முடியும் என்பதைக் காட்டிய படம் ஏவி.மெய்யப்பன் உருவாக்கிய ‘நாம் இருவர்’. காரைக்குடியில் கீற்றுக்கொட்டகையில் தயாரிக்கப்பட்ட அந்தப் படத்தில்தான், முதன் முதலில் பாரதியார் பாடல்கள் பயன்படுத்தப்பட்டன. அதன்பிறகு அவர் செய்த அடுக்கடுக்கான சாதனைகள் பல..‘மொழி மாற்றுப் படம்’ என்கிற கருத்தாக்கத்தின் கண்டுபிடிப்பாளர் அவர். அதுவே இன்று பான் இந்திய சினிமாவாக உள்ளது. தனது ‘வேதாள உலக’த்தில் திருவிதாங்கூர் ராஜ குடும்பத்தைச் சேர்ந்த லலிதா - பத்மினி சகோதரிகளின் நடனத்தை இடம்பெற வைத்தார். ‘வாழ்க்கை’யில் வைஜயந்தி மாலாவை அறிமுகம் செய்தார். சி.என்.அண்ணாதுரையின் ‘ஓர் இரவு’ நாடகத்துக்குத் திரை வடிவம் தந்தார். ‘பராசக்தி’ என்கிற திராவிட சினிமா ஓர் இயக்கமாக எழக் காரணமாக இருந்த படத்தில் பெரும் பங்கு வகித்தார். பாட்டு, நடனம் இல்லாத தமிழ் சினிமாவின் முதல் சஸ்பென்ஸ் த்ரில்லரான ‘அந்த நாள்’ படத்தைத் தயாரித்தார். .‘ஹம் பன்ச்சி ஏக் டால்கே’ (நாம் ஒரு கூட்டுப் பறவைகள்) என்கிற தேசிய விருதுபெற்ற சிறார் திரைப்படத்தை இந்தியில் எடுத்து பாலிவுட்டில் கால் பதித்தார். ‘களத்தூர் கண்ணம்மா’வில் கமல்ஹாசனை சிறார் நடிகராக அறிமுகம் செய்தார். எம்.ஜி.ஆரை வைத்து மெய்யப்பன் தயாரித்த ‘அன்பே வா’ வரலாற்று வசூல் சாதனை படைத்தது. ஏவி.எம் ஸ்டுடியோஸ் என்கிற பெரிய ஆலமரத்தின் முதல் சகாப்தம் ஏவி.மெய்யப்பன், அதன் இரண் டாம் பெரிய சகாப்தம் அவருடைய மகன் ஏவி.எம்.சரவணன். 72 வயதில் தந்தை மறைந்த பிறகு, அவரது ராஜபாட்டையைப் பத்திரமாகக் காப்பாற்றி வளர்த்தவர். இளைய தலைமுறைக்கு ஏற்ற படங்களை அவரும் அவருடைய சகோதரர்களும் தயாரித்தனர். அப்பாவிடம் பணிபுரிந்த அத்தனை ஊழியர்கள், தொழில்நுட்பக் கலைஞர்களையும் பத்திரமாகப் பார்த்துக்கொண்டார் சரவணன். 80களுடன் எம்.ஜி.ஆர். - சிவாஜியின் நட்சத்திர யுகம் முடிவை எய்தியிருந்தபோது, கமல் - ரஜினி இருவரையும் அந்த இடங்களில் வெற்றிகரமாகப் பொருத்தியதில் சரவணன் தயாரித்த படங்களுக்கு முக்கியப் பங்கு இருக்கிறது. ரஜினியை வைத்து ‘முரட்டுக்காளை’, கமலை வைத்து ‘சகலகலா வல்லவன்’ ஆகிய 100 நாள் படங்களைத் தயாரித்தார். அதன்பின் இளைய தலைமுறை இயக்குநர் களுக்கு வாய்ப்பளித்து படம் தயாரிக்க வேண்டும் என சரவணன் எடுத்த முடிவு, பல புதிய திறமை களைத் தமிழ் சினிமாவில் நட்சத்திர அந்தஸ்துக்கு உயர்த்தியது. அந்த வரிசையில் கே.பாக்யராஜின் ‘முந்தானை முடிச்சு’, விசுவின் ‘சம்சாரம் அது மின்சாரம்’, ராஜீவ் மேனனின் ‘மின்சாரக் கனவு’, சரணின் ‘ஜெமினி’, சசி சங்கரின் ‘பேரழகன்’ ஆகிய படங்கள் இடம்பிடித்தன. நாயக நடிகர்களை மட்டுமல்ல; மூத்த பெண் குணச்சித்திர நடிகரையும் கொண்டு பிரம்மாண்ட வெற்றியைக் கொடுக்க முடியும் என்பதை ‘பாட்டி சொல்லைத் தட்டாதே’ படம் வழியாகக் காட்டினார். கடந்த 2011ஆம் ஆண்டு புதுமுகங்கள் நடித்த ‘முதல் இடம்’ படத்துடன் படத் தயாரிப்பை நிறுத்திக் கொண்டார் சரவணன். அவரது மகள் உஷா சரவணன், தந்தையின் ராஜபாட்டையில் கிடைத்த அனுபவங்களோடு, தொலைக்காட்சி உலகில் வெற்றிகரமான தயாரிப்பாளராக வலம்வருகிறார். தலைமுறைகள் தாண்டி இயங்கிவரும் உலகின் பழமையான ஸ்டூடியோக்களில் ஒன்றான ஏவி.எம், தனக்குப் பிறகும் உயிர்ப்புடன் இயங்க வேண்டும் என்று விரும்பிய ஏவி.எம்.சரவணன், காட்சிக் கலையை மூச்சாகச் சுவாசித்தவர். .அந்த உணர்ச்சிகரமான தருணங்கள்! | வாழ்க்கையின் சீக்ரெட் ரெசிபி 29

இரண்டாம் சகாப்தம்! - ஏவி.எம்.சரவணன் | அஞ்சலி

அதிகம் வாசித்தவை...