அப்பாவான பப்பு! | சுட்ட கதை 07

ஹாலிவுட்டில் ‘பிக்’ (Big) என்கிற படம் 1988இல் வெளியானது. அதில் வரும் சிறுவன், ஒரு கண்காட்சிக்குச் செல்வான். அங்கே ஓர் இயந்திரம் இருக்கும். அதில் காசு போட்டால் எதிர்காலத்தைச் சொல்லும். சிறுவன் அதில் காசு போட, திடீரென்று பெரிய மனிதனாக மாறிவிடுவான்.அவனுடைய உள்மனம் ‘நான் இப்போது பெரியவனாக ஆகவேண்டும்’ என்று நினைக்கப்போய், அதையே அந்த இயந்திரம் நிறைவேற்றிவிடும். இதன்பின் அவனது வாழ்க்கையில் என்னவெல்லாம் நடக்கிறது என்பதே மீதிக்கதை..பெரியவனாக உருமாறிவிட்ட ஜோஷ் என்கிற அந்தச் சிறுவனின் வீட்டில், அவனை அடையாளம் தெரிந்துகொள்ளாமல் துரத்திவிடுவார்கள். அவனும் வேறிடம் சென்று தங்குவான். அவனது பள்ளி நண்பனுக்கு மட்டுமே ஜோஷ் உருமாறிவிட்டது தெரியவரும். அந்த இயந்திரத்திடம் சென்று மீண்டும் சிறுவனாக மாறிவிடலாம் என்றால், அந்தப் பொருள்காட்சி அந்த ஊரைவிட்டே சென்றிருக்கும்.மனமுடைந்த ‘திடீர்’ பெரியவன் ஜோஷ், ஒரு பொம்மைத் தொழிற்சாலையில் வேலைக்குச் சேர்வான். உருவம்தான் பெரிதே தவிர அவனுக்குள்ளே இருப்பது சிறுவன் ஜோஷ்தான். அந்தத் தொழிற் சாலையின் முதலாளியிடம் சிறுவர்களுக்கு என்னென்ன பிடிக்கும் எனப் பல புதிய யோசனைகளைச் சொல்லி அவரைக் கவர்ந்துவிடுவான். .இதனாலேயே அதே நிறுவனத்தில் பணிபுரியும் பால் என்பவன் ஜோஷை வெறுக்கத் தொடங்குவான். மற்றொரு சக ஊழியரான சூசன் என்கிற பெண், ஜோஷைக் காதலிக்கத் தொடங்குவாள், அவளை ஒருதலையாகக் காதலிக்கும் பாலுக்கு ஜோஷின் மீது கோபம் அதிகமாகும். இந்த நேரத்தில் அந்த இயந்திரம் கிடைத்துவிட, ஜோஷ் மீண்டும் சிறுவனாக ஆனானா? அவனது காதல் என்ன ஆனது? பாலின் வெறுப்பு கலந்த கோபத்தால் என்ன நடந்தது? இதெல்லாம்தான் ‘பிக்’ படத்தின் மீதிக்கதை. அந்தப் பெண்ணிடம் உண்மையைச் சொல்லிவிட்டு, ஜோஷ் அந்த இயந்திரத்தின் உதவியோடு சிறுவனாக மாறி, வீடு திரும்புவதுடன் படம் முடியும்.உங்களுக்கும் இந்நேரம் பொறி தட்டியி ருக்கும்! ஆமாம்! 2004இல் எஸ்.ஜே.சூர்யா இயக்கி நடித்து வெளியான ‘நியூ’ படம், ‘பிக்’ படத்தின் சாயலில் இருக்கிறதா? ‘நியூ’வில் இயந்திரத்துக்குப் பதில் ஒரு விஞ்ஞானி, பொம்மை நிறுவனத்தில் வேலை செய்யும் பெண்ணுக்குப் பதில், அந்த முதலாளியின் பெண். முழுவதும் பெரியவனாக மாறாமல் இரவில் மட்டும் பெரியவனாக இருப்பான். இவற்றோடு, அக்காலகட்டத்தில் யாரும் யோசிக்கவே துணியாத மிக வித்தியாச மான மாற்றத்தை எஸ்.ஜே.சூர்யா செய்தார். அது – பகலில் சிறுவனாகவும் இரவில் பெரியவனாகவும் இருக்கும் பப்பு என்கிற விச்சுவுக்கு நாயகியுடன் திருமணம் நடந்து, அவள் கர்ப்பமாகவும் ஆவாள். குழந்தை யும் இறுதியில் பிறந்துவிடும். ஒரு சிறுவன் ஹீரோவாக இருக்கும் படத்தில், இப்படி ஒரு காட்சியை வைக்க மிகவும் துணிச்சல் வேண்டும். இந்தப் பின்னணிக்குப் பொருத்தமான காட்சிகளையும் எஸ்.ஜே.சூர்யா வைத்திருப்பார். ரஹ்மானின் இசையில் அட்டகாசமான பாடல்களோடு, எஸ்.ஜே.சூர்யாவின் வித்தியாசமான நடிப்பில் வெளியான ‘நியூ’, படத்தின் கிளைமாக்ஸை, ‘பிக்’ படத்துடன் ஒப்பிட்டால் அதிலும் வித்தியாசமான ஒன்றைத் தனது ஸ்டைலில் கொடுத்தார் இயக்குநர். தமிழில் புத்தாயி ரத்தின் தொடக்கத்தில் வெளியான வித்தியாசமான முயற்சிகளில் ஒன்றாக இன்னும் இப்படம் திகழ்கிறது. - rajesh.scorpi@gmail.com