இந்தியா உட்பட உலகின் பெரும் பாலான நாடுகளில் கோடைக் காலத்தில்தான் கல்வி ஆண்டின் நிறைவுக்குப் பிந்தைய நீண்ட விடுமுறை அளிக்கப்படுகிறது. தமிழ்நாட்டில் அனைத்துப் பள்ளிகளிலும் மே மாதம் கோடை விடுமுறை. பிற இந்திய மாநிலங்கள் பலவற்றில் ஜூன் பிற்பகுதி அல்லது இறுதியில்தான் பள்ளி திறக்கிறது. சி.பி.எஸ்.இ. பள்ளிகள், சர்வதேசப் பாடத்திட்டத்தைப் பின்பற்றும் பள்ளிகளில் கல்வியாண்டு தொடக்கம் சற்று மாறுபடுகிறது.
உலகின் பிற நாடுகளின் புவியியல் அமைப்புக்கு ஏற்ப அவற்றின் கோடைக்காலம் மாறுபடுகிறது. பெரும்பாலும் கோடைக் காலம் நிறைவடைந்த பிறகே அனைத்து நாடுகளிலும் பள்ளி களிலும் புதிய கல்வி ஆண்டு தொடங்கப்படுகிறது. அந்த வகையில் ஆசிய நாடுகளில் பாகிஸ்தானில் மார்ச் இறுதி, ஏப்ரல் தொடக்கத்தில் புதிய கல்வி ஆண்டு தொடங்குகிறது. மலேசியாவில் ஜனவரி முதல் நவம்பர் வரை என்றிருந்த கல்வி ஆண்டு கோவிட் பெருந்தொற்றால் விளைந்த மாற்றங்களின் காரணமாக 2021க்குப் பிறகு மார்ச் முதல் ஜனவரி வரை என்று மாற்றப்பட்டுள்ளது.
ஐரோப்பிய நாடுகளில் பிரிட்டன், பிரான்ஸ், இத்தாலி, ரஷ்யா, போர்ச்சுகல், ஹங்கேரி ஆகிய நாடுகளில் செப்டம்பர் முதல் வாரத்தில் பள்ளிக் கல்வி ஆண்டு தொடங்குகிறது. கிரீஸ், பல்கேரியா உள்ளிட்ட சில நாடுகளில் செப்டம்பர் மூன்றாம் வாரத்தில் தொடங்குகிறது. ஈரான், இஸ்ரேல் உள்ளிட்ட சில மேற்காசிய நாடுகளிலும் செப்டம்பர் மாதத்தில் பள்ளி ஆண்டு தொடங்குகிறது.
வட அமெரிக்க நாடுகளில் கனடா, அமெரிக்காவில் செப்டம்பர் முதல் வாரத்தில் தொடங்குவது பொது நடை முறை. எகிப்து, மொராக்கோ. துனீசியா உள்ளிட்ட ஆப்ரிக்க நாடுகளில் செப்டம்பர் மூன்றாம் வாரத்தில் பள்ளி ஆண்டு தொடங்குகிறது.
பிரேசில், அர்ஜெண்டினா உள்ளிட்ட தென் அமெரிக்க நாடுகளின் பள்ளிகளில் பிப்ரவரி அல்லது மார்ச்சில் புதிய கல்வி ஆண்டு தொடங்குகிறது. தென் ஆப்ரிக்காவில் ஜனவரியில் தொடங்குகிறது. ஆஸ்திரேலியாவை ஒட்டியுள்ள நாடுகளில் ஜனவரி இறுதி அல்லது பிப்ரவரி முதல் வாரத்தில் புதிய பள்ளிக் கல்வி ஆண்டு தொடங்குகிறது.
- நந்தன்