பக்தர்களைக் காக்க ஆற்றில் மிதந்து வந்த பாண்டுரங்கன்

விஜயநகர சாம்ராஜ்ய ஆட்சி தமிழகத்தில் நடந்து கொண்டிருந்த காலகட்டம். மன்னர் ராமராயரின் படைத்தளபதி விட்டல் தேவராயர் என்பவர் தனது பரிவாரங்களுடன் தாமிரபரணி நதிக்கரை ஊர்களில் முகாமிட்டிருந்தார். ஒவ்வொரு ஊராக பார்வையிட்டு தனது அரசு அலுவல்களை மேற்கொண்டிருந்தார். இவர் மகாராஷ்டிராவில் அருள்பாலிக்கும் ஸ்ரீபாண்டுரங்க விட்டலரின் அதிதீவிர பக்தர். பாண்டுரங்கனை வழிபட்ட பின்னரே தனது அன்றாட அலுவல்களைத் தொடங்குவார்..அவ்வண்ணமே, நெல்லைச் சீமையில் தங்கியிருந்தபோது, நித்ய வழிபாட்டுக்கு பாண்டுரங்கரின் விக்கிரகம் இருந்தால் மன நிறைவாக இருக்குமே என்று நினைத்தார். விட்டலரின் தீவிர பக்தியை உணர்ந்த பெருமானும் அவரது கனவில் தோன்றினார். ‘மறுநாள் காலை ஆற்றங்கரைக்குச் சென்றால் எலுமிச்சை கனி ஒன்று ஆற்றின் போக்கில் மிதந்து வந்து ஓரிடத்தில் ஒதுங்கி நிற்கும். அந்த இடத்தில் மூழ்கித் தேடினால் விட்டலர் திருமேனி கிடைக்கும். அதனை வெளியில் எடுத்து வந்தபின், ‘எங்கே பிரதிஷ்டை செய்வது என்பதை ஒரு கருடன் வானில் வட்டமிட்டு குறிப்பிட்டு உணர்த்தும்’ என அசரீரியாய் சொல்லி மறைந்தார்..இதனால் மனம் மகிழ்ந்த தளபதி பொழுது விடிந்ததும் ஆற்றங்கரைக்கு விரைந்தார். கனவில் சொன்னதுபோல் ஓர் எலுமிச்சம்பழம் ஆற்றின் போக்கில் மிதந்து வந்து ஓரிடத்தில் கரை ஒதுங்கி நின்றது. மறு கணமே வீரர்கள் நீருக்குள் மூழ்கி தேடினர். சிறிது நேரத்துக்குள் சங்கு, சக்கரம் தாங்கி இடுப்பில் கைகளை வைத்த வண்ணம் பாண்டுரங்கர் விக்கிரகம் ஒன்றை தூக்கி வந்தனர். தனது இஷ்ட தெய்வமான விட்டலனைக் கண்டதும் தளபதி அவரை கரைக்கு எடுத்து வந்து பூஜைப் பணிகளை செய்தார். அதே வேளையில், எங்கிருந்தோ வந்த கருடன் ஒன்று படைபரிவாரங்கள் தங்கியிருந்த இடத்துக்கு வந்து மேற்கு நோக்கி சிறகடித்துச் சென்றது.ஆள் அரவமே இல்லாத ஓர் அடர்ந்த வனப்பகுதியில் கருடன் உணர்த்திய இடத்தில் மிகக் குறுகிய காலத்தில் ஸ்ரீபாண்டுரங்க விட்டலனுக்கு விஜயநகர கலைப் பாணியில் கற்றளி உருவானது. ஆற்றில் கண்டெடுக்கப்பட்ட விக்கிரகத்தை அர்த்தமண்டபத்தில் உற்சவராக பிரதிஷ்டை செய்து நித்ய பூஜைகளை தொடங்கினார். பாண்டுரங்க விட்டலனை கருவறை மூலவராகக் கொண்டு உருவான ஊராக அமைந்ததால் இறைவனின் பெயராலேயே ஊருக்கு விட்டலாபுரம் என்னும் காரணப் பெயர் ஏற்பட்டது. விஜயநகர ஆட்சியைத் தொடர்ந்து கிபி 17-ம் நூற்றாண்டில் மதுரை நாயக்கமன்னர் ஆட்சியிலும் பல திருப்பணிகள் செய்யப்பட்டு தானமும் அளிக்கப்பட்டது.பின்னர் நின்ற கோலத்தில் சத்யபாமா, ருக்மணி உடனுறை பாண்டுரங்க விட்டலரை சிலா ரூபமாய் கருவறை மூலவராக பிரதிஷ்டை செய்தனர். மூலவருக்கு தனிக் கோயில் எழுப்பப்பட்ட பின்பு இடப்பக்கமாக சத்யபாமா, வலப்பக்கமாக ருக்மணித் தாயார் ஆகியோருக்கு தனிக் கோயில்கள் கற்றளியாக இரு சுற்றுகளுடன் பிரம்மாண்டமாக அமைக்கப்பட்டன. பாஞ்சராத்ர ஆகம விதிப்படி தினமும் இருகால பூஜை நடைபெறுகிறது. நாலாபுறமும் உயர்ந்த திருமதில் சூழ கிழக்குப் பார்த்த வண்ணம் கோயில் அமைந்துள்ளது.அமைவிடம்: திருநெல்வேலி ஜங்ஷன் பேருந்து நிலையத்தில் இருந்து விட்டலாபுரத்துக்கு நேரடி பேருந்து வசதி உள்ளது. பயண தூரம் 17 கிமீ. அனவரதநல்லூர் வரை வரும் பேருந்தில் பயணித்தும் அங்கிருந்து விட்டலாபுரம் வரலாம்..கூறுக்காரர் | மயில்கள் அகவும் பெருநிலம் 09