விற்பனைக்கு தயார்நிலையில் உள்ள கன்றுகள்.
சந்தன மரக்கன்றுகளை வளர்த்து விற்பனை செய்வதில், திண்டுக்கல் அருகே சிறுமலை அடிவாரத்தில் அமைந்துள்ள ஏ.வெள்ளோடு கிராம விவசாயிகள் முன்னோடியாகத் திகழ்கின்றனர்.
மலையடிவாரப் பகுதி என்பதால், தொடக்கத்தில் திராட்சைச் சாகுபடிக்கு விவசாயிகள் முக்கியத்துவம் கொடுத்து வந்தனர். காலப்போக்கில் திராட்சை விவசாயத்தில் அதிகப் பராமரிப்பு, கூடுதலான மருந்துச் செலவு, தொழிலாளர்கள் பற்றாக்குறையால் பணிகள் பாதிப்பு, மழைக்காலங்களில் லாபக் குறைவு எனப் பல பிரச்சினைகளை எதிர்கொண்டனர்.
இதனால், வேறு சாகுபடிக்கு மாறத் தொடங்கினர். சிலர் மரக்கன்றுகளை வளர்க்கும் நாற்றங்கால் (நர்சரி) தொழிலில் ஆர்வம் காட்டினர். இதில் குறிப்பாகச் சந்தன மரக்கன்றுகள் வளர்ப்பிற்கு முக்கியத்துவம் கொடுத்தனர். இதையறிந்த பலரும் இவர்களைப் பின்பற்றி, தற்போது சந்தன மரக்கன்று வளர்ப்பில் அதிக லாபம் ஈட்டி வருகின்றனர்.
இத்தொழிலில் ஆண்டு முழுவதும் நேரடியாகவும் மறைமுகமாகவும் ஆயிரத்திற்கும் மேற்பட்ட விவசாயத் தொழிலாளர்களுக்குத் தினமும் வேலைவாய்ப்பு கிடைக்கிறது.
சந்தனம், செம்மரம், தேக்கு, வேம்பு, புங்கன், நாவல், இலுப்பை, நீர்மருது, செண்பகம், ஆவி, மகாகனி, வில்வம், சில்வர் ஓக், மே பிளவர், மஞ்சள் கொன்றை, எலுமிச்சை, கொய்யா, மாதுளை, நாரத்தை, கருவேப்பிலை, சவுக்கு உட்பட 40-க்கும் மேற்பட்ட வகையான கன்றுகளை இப்பகுதி விவசாயிகள் உற்பத்தி செய்கின்றனர்.
