கத்தரிக்காய் தரம் பிரிக்கும் பணி
வானம் பார்த்த கரிசல் பூமியில் பண்ணைக்குட்டை அமைத்து, இருபோகக் கத்தரி சாகுபடியை மாரந்தை கிராமத்தைச் சேர்ந்த விவசாயி முனியாண்டி சாத்தியப்படுத்தியுள்ளார்.
சிவகங்கை மாவட்டம், காளையார் கோவில் அருகேயுள்ள மாரந்தை கிராமம் வானம் பார்த்த கரிசல் பூமிப் பகுதியாகும். இங்குள்ள பெரும்பாலான விவசாயிகள் முன்பு மிளகாய் சாகுபடி செய்து வந்தனர். போதிய லாபம் கிடைக்காததால் பலரும் விவசாயத்தைக் கைவிட்டுத் தங்களது நிலங்களைத் தரிசாக விட்டனர்.
அப்படிச் செய்ய மனமில்லாத விவசாயி எம். முனியாண்டி (52), பண்ணைக் குட்டை மூலம் அவ்வப்போது பெய்யும் மழைநீரைச் சேகரித்துக் கத்தரி சாகுபடி செய்து வருகிறார். இருபோகம் விளைவித்து அதில் போதிய வருவாய் கிடைப்பதால், கடந்த 20 ஆண்டுகளாகத் தொடர்ந்து கத்தரி சாகுபடியை மேற்கொண்டு வருகிறார்.
இதுகுறித்து அவர் கூறியதாவது: “எனக்கு 5 ஏக்கர் நிலம் உள்ளது. இருபது ஆண்டுகளுக்கு முன்பு, 5 ஏக்கரிலும் மிளகாய் சாகுபடி செய்தேன். ஒரு சமயத்தில் நோய்த் தாக்குதலால் கடுமையான பாதிப்பு ஏற்பட்டது. இதனால், விவசாயத்தைக் கைவிடும் நிலைக்குத் தள்ளப்பட்டேன்.
அப்போது வேளாண்மைப் பொறியியல் துறை மூலம் பண்ணைக்குட்டை வெட்டித் தருவதைக் கேள்விப்பட்டேன். அதிகாரிகளை அணுகி, 2005ஆம் ஆண்டு 40 அடி நீளம், 21 அடி அகலம், 6 அடி ஆழம் கொண்ட பண்ணைக்குட்டையை அமைத்தேன். அந்தப் பண்ணைக்குட்டை நீரைப் பயன்படுத்தி, ஒரு ஏக்கரில் நாட்டு ரகக் கத்தரியைச் சாகுபடி செய்து வருகிறேன்.
