சமீபத்திய ஆய்வு முடிவுகளின்படி, தமிழ்நாட்டின் விவசாய நிலங்களில் கிட்டத்தட்ட 50 சதவீத நிலங்களில் போரான் சத்து பற்றாக்குறை இருப்பதாகக் கண்டறியப்பட்டுள்ளது.
இயற்கை விவசாயத்தில் பல பாரம்பரிய முறைகள் பெரும் பலன் தந்தாலும், சில நம்பிக்கைகள் அறிவியல் ஆய்வுகளுக்கு உட்படாமல் பரப்பப்பட்டு வருகின்றன. அதில் முதன்மையான ஒன்று: “எருக்கு இலை போரான் சத்து நிறைந்தது; அதன் கரைசல் பயிர்களின் போரான் பற்றாக்குறையைப் போக்கும்” என்ற கருத்து ஆகும்.
கள யதார்த்தமும் தாவர உடலியலும் (Plant Physiology) என்ன சொல்கின்றன என்பதைப் பார்ப்போம். எருக்கு இலைகளை ஆய்வகப் பரிசோதனைக்கு உட்படுத்திய அறிவியல் முடிவுகள் எவற்றிலும், அது குறிப்பிடத்தக்க அளவில் போரான் சத்தைக் கொண்டிருப்பதாக நிரூபிக்கப்படவில்லை.
மாறாக, எருக்குச் செடியில் பொட்டாசியம், கால்சியம், குளோரின் போன்ற தாதுக்களே பிரதானமாகக் காணப்படுகின்றன. அறிவியல் பூர்வமாக இல்லாத ஒரு மூலப்பொருளை, போரான் சத்துக்கான முதன்மைத் தீர்வாகக் கருதுவது விவசாயிகளுக்கு ஏமாற்றத்தையே தரும்.
போரான் என்பது பயிர்களில் பூக்கள் மலர்வதற்கும், மகரந்தச் சேர்க்கை சிறப்பாக நடைபெறுவதற்கும், காய்கள்-பழங்கள் பிடிப்பதற்கும் அவசியமான ஒரு நுண்ணூட்டச்சத்து ஆகும்.