கோவை அருகே தீத்திபாளையத்தில் வளர்ந்துள்ள டிராகன் பழச்சாகுபடி. படங்கள்: ஜெ.மனோகரன்.
மேற்குத் தொடர்ச்சி மலையடிவாரக் கிராமங்களில் ஒன்றான கோவை அருகே உள்ள தீத்திபாளையத்தில், தனது தோட்டத்தில் கடந்த 7 ஆண்டுகளாக டிராகன் செடித்தண்டை நட்டு வளர்த்து அறுவடை செய்து வருகிறார் 73 வயதான விவசாயி டி.ஆர். பொன்னுசாமி.
சிறு விவசாயிகள் வைத்துள்ள 20 சென்ட் போன்ற சிறிய நிலப்பரப்பிலும் கூட, மெக்சிகோவில் இருந்து இறக்குமதியான சத்து நிறைந்த இந்தப் பழத்தைப் பயிரிட்டுச் சோதித்தும், சாதித்தும் வருகிறார் பொன்னுசாமி.
குறைந்த நீரும் எளிய பராமரிப்பும் போதுமானது என்பதால், கோவை மாவட்டத்தின் 12 வட்டாரங்களிலும் விவசாயிகளிடம் ஒரு மாற்றுப் பயிராக டிராகன் பழச் சாகுபடி உருவெடுத்து வருகிறது.
கள்ளி வகையைச் சேர்ந்த இந்தப் பயிர், வறண்ட மற்றும் மானாவாரிப் பகுதிகளில் நன்கு வளரும். வாழைச் சாகுபடிக்குத் தேவைப்படும் தண்ணீரில் சுமார் 20 சதவீதம் மட்டுமே இதற்குப் போதுமானது. இருப்பினும் களிமண் நிலம், தேங்கி நிற்கும் நீர் அதிக மழைப்பொழிவு ஆகியவை இதற்கு ஏற்றவை அல்ல.
இச்செடிகளுக்கு சிமெண்ட் அல்லது கல் தூண்கள், பந்தல் போன்ற தாங்கி வளரத் தேவையான கட்டமைப்புகள் தேவைப்படுவதால், ஆரம்பக்கட்டப் பராமரிப்புச் செலவு அதிகமாக இருக்கும்.
