பொறியியல் படிப்பில் சேர விரும்பும் மாணவர்கள் கல்லூரியை எப்படித் தேர்வுசெய்ய வேண்டும் என்று கடந்த வாரம் பார்த்தோம். பாடப் பிரிவைத் தேர்வுசெய்வது குறித்து இப்போது பார்க்கலாம். பொறியியல் படிப்பு என்றவுடனே மாணவர்களுக்கு மட்டுமின்றிப் பெற்றோர் அனைவருக்கும் சட்டென நினைவுக்கு வருவது இ.சி.இ. (எலெக்ட்ரானிக்ஸ் மற்றும் கம்யூனிகேஷன் இன்ஜினியரிங்). சமீபகாலமாக 2-வது இடத்தில் மெக்கானிக்கல் இன்ஜினரிங் இருந்து வருகிறது. ஒருகாலத்தில் ஐ.டி எனப்படும் இன்பர்மேஷன் டெக்னாலஜி, கம்ப்யூட்டர் சயின்ஸ் பாடப் பிரிவுகளுக்கு மாணவர்கள் மத்தியில் அமோக வரவேற்பு இருந்தது.
ஆனால், கடந்த சில ஆண்டுகளாக அந்த இடங்களை இ.சி.இ.யும், மெக்கானிக்கல் இன்ஜினியரிங் படிப்பும் பிடித்துக்கொண்டன. சிலருக்கு எப்போதுமே ஒரு குணம் உண்டு. பக்கத்து வீட்டுக்காரர் ஒரு பொருளை வாங்கினால் அதை நாமும் எப்படியாவது வாங்கிவிட வேண்டும் என்று துடிப்பது. இது படிப்புக்கும் பொருந்தும். பக்கத்து வீட்டு மாணவரோ, உறவினரோ இன்ஜினியரிங்கில் குறிப்பிட்ட ஒரு பாடத்தில் சேர்ந்திருப்பார். அவரைப் பார்த்துக்கொண்டு அப்படியே சேர்ந்துவிடுவது நமது மாணவர்களின் இயல்பாக மாறியிருக்கிறது. உண்மையில் நமது திறமை என்ன? நமது ஆர்வம் என்ன? என்பதையெல்லாம் மாணவ-மாணவிகள் பொதுவாகப் பார்ப்பது இல்லை.
மாணவர்கள் மத்தியில் அதிக வரவேற்பு இருக்கும் குறிப்பிட்ட சில பாடப் பிரிவுகளைப் படித்து முடிக்கும் அனைவருக்குமே கேம்பஸ் இண்டர்வியூவில் வேலை கிடைத்துவிடுவதில்லை. பொறியியலில் எந்தப் பாடப் பிரிவை எடுத்துப் படித்தாலும் அதைச் சிறந்த முறையில் முடிக்கும் மாணவர்களுக்கே உடனடியாக வேலை கிடைக்கிறது என்பதுதான் நடைமுறை உண்மை. என்ன பாடப் பிரிவில் பொறியியல் பட்டம் பெற்றிருக்கிறோம்? என்பதைக் காட்டிலும் அந்தப் பாடப் பிரிவை எப்படிப் படித்து முடித்திருருக்கிறோம்? என்பதுதான் முக்கியம். வெறும் படிப்பு மட்டுமின்றி வேலைக்குத் தேவையான தகுதிகளை வளர்த்துக் கொண்டிருக்கிறோமா என்பதுதான் வேலைவாய்ப்பை உறுதி செய்கிறதே, தவிர படித்த பட்டம் மட்டுமே அல்ல என்பதை மாணவர்கள் உணர வேண்டும்.
எனவே, பொறியியலில் சேரும் மாணவர்கள் தங்களுக்கு எந்தத் துறை மீது ஆர்வம் இருக்கிறது? அத்துறையில் சாதிப்பதற்குத் தேவையான திறமை தம்மிடம் உள்ளதா? ஒருவேளை அத்திறமை இல்லாவிட்டால் அதை வளர்த்துக்கொள்ள முடியுமா? பி.இ. அல்லது பி.டெக்.. முடித்துவிட்டு சாப்ட்வேர் துறையில் நுழையப் போகிறோமா? எலெக்ட்ரானிக்ஸ் சார்ந்த துறைகளில் சேரப்போகிறோமா? அல்லது மின்சார உற்பத்தி, வாகனங்கள், ஆட்டோமொபைல் சாதனங்கள் தயாரிப்பு என உற்பத்தி சார்ந்த துறைகளில் நுழையப் போகிறோமோ? என்பதையெல்லாம் இப்போதே தீர யோசித்து ஒரு முடிவுக்கு வந்துவிட வேண்டும். அம்மா, அப்பா சொல்கிறார்கள். நண்பர்கள் வற்புறுத்துகிறார்கள், உறவினர்கள் ஆலோசனை கூறுகிறார்கள் என்று சொல்லி உங்களுக்கு விருப்பமில்லாத, கடினமாக இருக்கும் என்று நீங்கள் நினைக்கிற ஒரு பாடப் பிரிவைத் தேர்வுசெய்துவிடாதீர்கள். காரணம் பின்னர் கஷ்டப்படப்போவது நீங்கள்தானே தவிர, பெற்றோரோ, உற்றார் உறவினரோ, நண்பரோ அல்ல உங்களின் ஆர்வமும், திறமையும் நீங்கள் சேர விரும்பும் பாடப் பிரிவைத் தீர்மானிக்கட்டும். மற்ற காரணிகளுக்கு ஒருபோதும் இடம்கொடுத்துவிடாதீர்கள். பிடித்த பாடப் பிரிவில் சேரும்போது, நல்ல ஆர்வத்துடன் படித்து நல்ல மதிப்பெண்களுடன், தேவையான திறமைகளுடன் பொறியியல் பட்டதாரியாக வெளியே வரலாம்.
கேம்பஸ் இண்டர்வியூ-தேர்வில் வேலையும் தேடி வரும். பிடித்த கல்லூரியில், பிடித்த பாடப் பிரிவில் சேர்ந்து சிறந்த முறையில் பொறியியல் படித்து முடித்துப் பணியில் சேர வாழ்த்துக்கள்!