ஒரு திரையரங்கத்துக்குள் நுழைகிறீர்கள். இருட்டில் தடுமாறி இருக்கையில் அமர்கிறீர்கள். உங்கள் இருக்கை உறுத்துகிறது. பக்கத்தில் இருவர் பேசிக்கொண்டே இருக்கிறார்கள். எங்கோ பாப்கார்ன் மணம். அவ்வப்போது திறன்பேசி ஒலி. இவை எல்லாவற்றிலும் உங்கள் கவனம் திரும்புகிறது. சற்று நேரம் கழித்து கவனம் மெல்ல மெல்ல திரைப்படத்தில் செல்கிறது. சுற்றி உள்ள விஷயங்கள் இப்போது உங்கள் கவனத்தில் இல்லை, ஒருவேளை அந்தத் திரைப்படம் நன்றாக இருக்கும்பட்சத்தில்!
நம் கவனம் என்பது ‘ஃபோகஸ்லைட்’ போன்றது என ஏற்கெனவே பார்த்தோம். எது முக்கியமோ அதை மையப்படுத்தி (center), நம் கவனத்தைக் குவித்துத் தேவையில்லாததை விளிம்பில் (periphery) வைக்கிறோம். இப்படி வெளியுலகிலிருந்து வரும் தூண்டுதல்களில் எது தேவை, எது தேவையில்லை என்பதை மூளையின் சில பகுதிகள் வடிகட்டி (Filter), முக்கியமான விஷயங்களில் மட்டும் கவனம் செலுத்த வைக்கிறது.