இரண்டு ‘இதயங்கள்’ வேண்டுமா? | இதயம் போற்று 33

‘இதயம் போற்று’ தொடரில் நடைப்பயிற்சியின் அவசியம் குறித்துப் பல இடங்களில் சொல்லியிருக்கிறேன். நடைப்பயிற்சி எவ்வாறெல்லாம் இதயத்தைப் பாதுகாக்கிறது? நலம் தரும் நடை பயில விதிமுறைகள் உண்டா? இந்தக் கேள்விகளுக்கு இந்த வாரம் விடை தேடுவோம்.

உடற்பயிற்சிகளின் அரசன்: உடலுக்கும் மனதுக்கும் ஒரே நேரத்தில் உடலியக்கப் பயிற்சி கொடுக்க வேண்டுமானால், அது நடைப்பயிற்சியால் மட்டுமே முடியும். மற்ற பயிற்சிகளுக்கெல்லாம் தனிப்பட்ட கருவிகளும் பயிற்சியாளர் அல்லது பயிற்சி மையமும் தேவைப்படும். பணச் செலவும் ஆகும். ஆனால், நடைப்பயிற்சிக்கு இவை எதுவுமே தேவை இல்லை; பணச் செலவும் இல்லை. இதனால்தான் நடைப்பயிற்சியை ‘உடற்பயிற்சிகளின் அரசன்’ (King of exercises) என்கிறோம்.