புதுடெல்லி: மகளிருக்கான 16-வது ஜூனியர் தேசிய சாம்பியன்ஷிப் ஹாக்கி போட்டி புனேவில் இன்று தொடங்குகிறது. வரும் 23-ம் தேதி வரை நடைபெறும் இந்தத் தொடரில் 30 அணிகள் கலந்து கொள்கின்றன. ‘ஏ’, ‘பி’, ‘சி’ என 3 டிவிஷன்களாக போட்டிகள் நடைபெற உள்ளன.
சாம்பியன் பட்டத்துக்கான ‘ஏ’ டிவிஷனில் 12 அணிகள் இடம் பெற்றுள்ளன. இவை 4 பிரிவுகளாக பிரிக்கப்பட்டுள்ளன. ‘ஏ’ பிரிவில் ஜார்க்கண்ட், பஞ்சாப், சண்டிகர் அணிகளும் ‘பி’ பிரிவில் ஹரியாணா, ஒடிசா, பெங்கால் அணிகளும் இடம் பெற்றுள்ளன.
‘சி’ பிரிவில் உத்தரப்பிரதேசம், மகாராஷ்டிரா, மணிப்பூர் அணிகளும் ‘டி’ பிரிவில் சத்தீஸ்கர், மத்தியபிரதேசம், இமாச்சலப்பிரதேசம் அணிகளும் உள்ளன. ‘ஏ’ டிவிஷன் போட்டிகள் வரும் 16-ம் தேதி முதல் நடைபெறுகின்றன.
லீக் சுற்றின் முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் கால் இறுதி சுற்றுக்கு முன்னேறும். கால் இறுதி சுற்று ஆடடங்கள் 20-ம் தேதியும், அரை இறுதி ஆட்டங்கள் 21-ம் தேதியும் நடைபெறுகின்றன.
இறுதிப் போட்டி 23-ம் தேதி நடைபெறுகிறது. ‘ஏ’ டிவிஷனில் 11 மற்றும் 12-வது இடத்தை பிடிக்கும் அணிகள் அடுத்த ஆண்டுக்கான போட்டியில் ‘பி’ டிவிஷனுக்கு தகுதி இறக்கம் செய்யப்படும்.
‘பி’ டிவிஷனில் 10 அணிகள் உள்ளன. இவை 2 பிரிவுகளாக பிரிக்கப்பட்டுள்ளன. ‘ஏ’ பிரிவில் ஆந்திரா, அசாம், டெல்லி, கேரளா, மிசோரம் அணிகளும் ‘பி’ பிரிவில் கர்நாடகா, உத்தராகண்ட், தமிழ்நாடு, பிஹார், கோவா அணிகளும் இடம் பெற்றுள்ளன.
இதில் முதல் 2 இடங்களை பிடிக்கும் அணிகள் ‘ஏ’ டிவிஷனுக்கு தரம் உயர்த்தப்படும். அதேவேளையில் கடைசி 2 இடங்களை பிடிக்கும் அணிகள் ‘சி’ டிவிஷனுக்கு தகுதி இறக்கம் செய்யப்படும்.
‘சி’ டிவிஷனில் இடம் பெற்றுள்ள 8 அணிகள் இரு பிரிவாக பிரிக்கப்பட்டுள்ளன. ‘ஏ’ பிரிவில் அருணாச்சலப்பிரதேசம், தாத்ரா & நாகர் ஹவேலி மற்றும் டையூ டாமன், ராஜஸ்தான், திரிபுரா அணிகளும், ‘பி’ பிரிவில் புதுச்சேரி, குஜராத், ஜம்மு & காஷ்மீர், தெலங்கானா ஆகிய அணிகளும் இடம் பெற்றுள்ளன. இதில் முதல் 2 இடங்களை பிடிக்கும் அணிகள் ‘பி’ டிவிஷனுக்கு முன்னேறும்.
