பெங்களூரு: விஜய் ஹசாரே ஒருநாள் போட்டித் தொடரில் நேற்று பெங்களூருவில் நடைபெற்ற ஆட்டத்தில் டெல்லி - ஆந்திரா அணிகள் மோதின. இதில் முதலில் பேட் செய்த ஆந்திரா அணி 50 ஓவர்களில் 8 விக்கெட்கள் இழப்புக்கு 298 ரன்கள் குவித்தது. அதிகபட்சமாக ரிக்கி புயி 105 பந்துகளில், 7 சிக்ஸர்கள், 11 பவுண்டரிகளுடன் 122 ரன்கள் விளாசினார். டெல்லி அணி தரப்பில் சிமர்ஜீத் சிங் 5, பிரின்ஸ் யாதவ் 3 விக்கெட்களை வீழ்த்தினர்.
299 ரன்கள் இலக்குடன் பேட் செய்த டெல்லி அணி 37.4 ஓவர்களில் 6 விக்கெட்கள் இழப்புக்கு 300 ரன்கள் எடுத்து 4 விக்கெட்கள் வித்தியாசத்தில் வெற்றி பெற்றது. இந்திய அணியின் சீனியர் நட்சத்திர பேட்ஸ்மேனான விராட் கோலி 101 பந்துகளில், 3 சிக்ஸர்கள், 14 பவுண்டரிகளுடன் 131 ரன்கள் விளாசினார். நிதிஷ் ராணா 55 பந்துகளில், 2 சிக்ஸர்கள், 9 பவுண்டரிகளுடன் 77 ரன்களும், பிரியன்ஷ் ஆர்யா 44 பந்துகளில், 5 சிக்ஸர்கள், 7 பவுண்டரிகளுடன் 74 ரன்களும் சேர்த்தனர். கேப்டன் ரிஷப் பந்த் 5 ரன்களில் ஆட்டமிழந்து ஏமாற்றம் அளித்தார்.
15 ஆண்டுகளுக்கு பிறகு விஜய் ஹசாரே போட்டியில் களமிறங்கிய விராட் கோலி ஆந்திர அணிக்கு எதிராக 131 ரன்கள் எடுத்தன் மூலம் லிஸ்ட் ஏ கிரிக்கெட்டில் அதிவேகமாக 16 ஆயிரம் ரன்களைக் கடந்த வீரர் என்ற சாதனையை படைத்தார். தனது 330-வது இன்னிங்ஸில் விராட் கோலி இந்த சாதனையைப் படைத்துள்ளார். இதற்கு முன்னர் இந்திய அணியின் முன்னாள் வீரர் சச்சின் டெண்டுல்கர் லிஸ்ட் ஏ கிரிக்கெட்டில் 391 இன்னிங்ஸ்களில் 16 ஆயிரம் ரன்களைக் கடந்திருந்ததே சாதனையாக இருந்தது. அந்த சாதனையை விராட் கோலி தற்போது முறியடித்துள்ளார்.
லிஸ்ட் ஏ கிரிக்கெட்டில் 16 ஆயிரம் ரன்களை விரைவாக குவித்த வீரர்களின் பட்டியலில் டாப் 5-ல் இந்திய வீரர்களில் விராட் கோலியும், சச்சின் டெண்டுல்கர் மட்டுமே உள்ளனர். இவர்களுக்கு அடுத்தபடியாக கார்டன் கிரீனிட்ஜ் (422 இன்னிங்ஸ்கள்), ரிக்கி பாண்டிங் (430), கிரகாம் கூச் (435), விவியன் ரிச்சர்ட்ஸ் (435) ஆகியோர் உள்ளனர்.விஜய் ஹசாரே ஒருநாள் போட்டித் தொடரில் ஆந்திரா அணிக்கு எதிரான ஆட்டத்தில் பந்தை பவுண்டரிக்கு விரட்டிய விராட் கோலி.
