கட்டாக்: இந்தியா - தென் ஆப்பிரிக்கா அணிகள் இடையிலான 5 ஆட்டங்கள் கொண்ட டி 20 கிரிக்கெட் தொடரின் முதல் போட்டி கட்டாக்கில் உள்ள பாராபதி மைதானத்தில் இன்று இரவு 7 மணிக்கு நடைபெறுகிறது.
இந்த இரு தரப்பு டி 20 கிரிக்கெட் தொடரை அடுத்த ஆண்டு பிப்ரவரியில் நடைபெற உள்ள டி 20 உலகக் கோப்பை தொடருக்கான முன்னோட்டமாக இந்திய அணி கருதக்கூடும். ஏனெனில் உலகக் கோப்பை தொடருக்கு முன்னதாக இந்திய அணி 10 டி 20 ஆட்டங்களில் மட்டுமே விளையாட உள்ளது. இதில் தற்போது நடைபெற உள்ள தென் ஆப்பிரிக்க அணிக்கு எதிரான தொடரும் அடங்கும். இந்தத் தொடரை அடுத்து நியூஸிலாந்து அணிக்கு எதிராக 5 ஆட்டங்கள் கொண்ட டி 20 தொடரிலும் இந்திய அணி விளையாட உள்ளது.
இதனால் தென் ஆப்பிரிக்காவுக்கு எதிரான டி 20 தொடரானது உலகக் கோப்பை தொடரில் விளையாடும் சிறந்த அணிச் சேர்க்கையை தேர்வு செய்வதற்கான களமாக இந்தியாவுக்கு அமையக்கூடும். கடந்த ஆண்டு டி 20 உலகக் கோப்பை வென்ற இந்திய அணி அதன் பின்னர் 26 ஆட்டங்களில் வெற்றிகளை குவித்துள்ளது. 4 ஆட்டங்களில் மட்டுமே தோல்வி அடைந்துள்ளது.
இருப்பினும் இந்திய அணி ஒரு டி 20 தொடரை கூட இழக்கவில்லை. இதனால் டி 20 உலகக் கோப்பைக்கு தயாராகும் வகையில் சிறிய மாற்றங்கள் மட்டுமே செய்யப்படக்கூடும் என கருதப்படுகிறது. இதனால் தென் ஆப்பிரிக்க அணிக்கு எதிராக இந்திய அணியின் வீரர்கள் தங்கள் திறமையைக் கூர்மைப்படுத்திக் கொள்ளக்கூடும். கழுத்து பகுதியில் ஏற்பட்ட காயத்தில் இருந்து குணமடைந்துள்ள ஷுப்மன் கில் டி20 தொடரில் களமிறங்க உள்ளார்.
கடந்த ஐபிஎல் தொடரில் இருந்து தொடர்ச்சியாக விளையாடி வந்த ஷுப்மன் கில், கடந்த மாதம் தென் ஆப்பிரிக்காவுக்கு எதிரான முதல் டெஸ்ட் போட்டியில் காயம் அடைந்ததால் சுமார் 3 வார காலம் கிரிக்கெட்டில் இருந்து விலகி இருந்தார். தற்போது முழு உடற்தகுதியை எட்டி உள்ளதால் மீண்டும் விளையாட ஆயத்தமாகி உள்ளார். எனினும் அவரது பணிச்சுமையை அணி நிர்வாகம் கண்காணிக்கக்கூடும்.
இது ஒருபுறம் இருக்க அபிஷேக் சர்மா, ஷுப்மன் கில் கூட்டணி இணைவது ரசிகர்கள் மத்தியில் மிகுந்த எதிர்பார்ப்பை ஏற்படுத்தி உள்ளது. இந்த கூட்டணி கடந்த சில ஆட்டங்களில் தாக்கத்தை ஏற்படுத்தக்கூடிய அளவிலான செயல் திறனை வெளிப்படுத்தி உள்ளது. அபிஷேக் சர்மா, கடைசியாக ஆஸ்திரேலிய சுற்றுப் பயணத்தில் 163 ரன்கள் விளாசியிருந்தார்.
சமீபத்தில் சையது முஸ்டாக் அலி டி 20 தொடரில் பெங்கால் அணிக்கு எதிராக 52 பந்துகளில், 148 ரன்களை விளாசி மிரட்டியிருந்தார். அவரது ஸ்டிரைக் ரேட் 249 ஆக இருந்தது. இதனால் அவரது மட்டை வீச்சு ரசிகர்களுக்கு விருந்தளிக்கக்கூடும். ஆசிய கோப்பை தொடரின் போது தொடை பகுதியில் காயம் ஆல் ரவுண்டரான ஹர்திக் பாண்டியா 2 மாதங்களுக்குப் பிறகு மீண்டும் அணிக்கு திரும்பி உள்ளார். சமீபத்தில் அவர், சையது முஸ்டாக் அலி தொடரில் 42 பந்துகளில் 77 ரன்கள் விளாசியிருந்தார். அவரது வருகை பந்து வீச்சிலும் பலம் சேர்க்கக்கூடும்.
அதேவேளையில் கேப்டன் சூர்யகுமார் யாதவும் பார்முக்கு திரும்புவதில் கவனம் செலுத்தக்கூடும். கடந்த ஆண்டு ஜூலை மாதம் இந்திய டி 20 அணியின் கேப்டன் சூர்யகுமார் யாதவ் நியமிக்கப்பட்டு இருந்தார். அதன் பின்னர் அவர், விளையாடிய 15 டி20 ஆட்டங்களில் 184 ரன்கள் மட்டுமே சேர்த்துள்ளார். சராசரி 15.33 ஆக உள்ளது. ஒட்டுமொத்தமாக சூர்யகுமார் யாதவ் கடந்த 20 ஆட்டங்களில் ஒருமுறை கூட அரை சதத்தை எட்டவில்லை. அவரது ஸ்டிரைக் ரேட் 187-ல் இருந்து 127.77 ஆக குறைந்துள்ளது.
சையது முஸ்டாக் அலி தொடரில் கூட சூர்யகுமார் யாதவிடம் பெரிய அளவிலான பேட்டிங் செயல் திறன் வெளிப்படவில்லை. அவர், 5 ஆட்டங்களில் 165 ரன்களே சேர்த்தார். டி 20 உலகக் கோப்பைக்கு முன்னதாக இழந்த பார்மை மீட்டெடுப்பதில் கவனம் செலுத்த வேண்டிய கட்டாயத்தில் சூர்யகுமார் யாதவ் உள்ளார்.
இன்றைய ஆட்டத்தில் விக்கெட் கீப்பர் பேட்ஸ்மேனாக சஞ்சு சாம்சனே களமிறங்கக்கூடும் என எதிர்பார்க்கப் படுகிறது. ஏனெனில் ஜிதேஷ் சர்மாவைவிட சாம்சன் சிறந்த பார்மில் உள்ளார். டி20 உலகக் கோப்பை தொடருக்கு பின்னர் இந்திய அணியில் அதிக ரன்கள் குவித்த வீரர்களின் பட்டியலில் சஞ்சு சாம்சன் 3-வது இடத்தில் உள்ளார்.
மேலும் கடந்த காலங்களில் தென் ஆப்பிரிக்காவுக்கு எதிராக தொடக்க வீரராக களமிறங்கி 2 சதங்கள் அடித்திருந்தார். சமீபத்தில் சையது முஸ்டாக் அலி தொடர் 2 அரை சதங்களும், 2 முறை 40 ரன்களுக்கு மேலும் சேர்த்திருந்தார்.
தென் ஆப்பிரிக்க அணி எய்டன் மார்க்ரம் தலைமையில் களமிறங்குகிறது. வேகப்பந்து வீச்சாளர் அன்ரிச் நோர்க்கியோ ஒரு வருடத்துக்கு பின்னர் அணிக்கு திரும்பி உள்ளது பலம் சேர்க்கக்கூடும். பேட்டிங்கில் எய்டன் மார்க்ரம், டெவால்ட் பிரேவிஸ், ரீஸா ஹெண்ட்ரிக்ஸ், டிரிஸ்டன் ஸ்டப்ஸ், டேவிட் மில்லர், குயிண்டன் டி காக், கார்பின் போஷ், மார்கோ யான்சன் பலம் சேர்க்கக்கூடும்.
அணிகள் விவரம் - இந்தியா: சூர்யகுமார் யாதவ் (கேப்டன்), ஷுப்மன்கில், அபிஷேக் சர்மா, திலக் வர்மா, சஞ்சு சாம்சன், ஜிதேஷ் சர்மா, ஹர்திக் பாண்டியா, ஷிவம் துபே, அக்சர் படேல், வாஷிங்டன் சுந்தர், வருண் சக்ரவர்த்தி, குல்தீப் யாதவ், ஜஸ்பிரீத் பும்ரா, ஹர்ஷித் ராணா, அர்ஷ்தீப் சிங்.
தென் ஆப்பிரிக்கா: எய்டன் மார்க்ரம் (கேப்டன்), குயிண்டன் டி காக், ரீஸா ஹெண்ட்ரிக்ஸ், டேவிட் மில்லர், டிரிஸ்டன் ஸ்டப்ஸ், டெவால்ட் பிரேவிஸ், கார்பின் போஷ், மார்கோ யான்சன், கேசவ் மகாராஜ், டோனோவன் ஃபெரேரியா, ஜார்ஜ் லின்டே, ஓட்னீல் பார்ட்மேன், அன்ரிச் நோர்க்கியா, லுங்கி நிகிடி.
