துபாய்: சர்வதேச கிரிக்கெட் கவுன்சில் (ஐசிசி) வெளியிட்டுள்ள டி20 கிரிக்கெட் வீராங்கனைகள் தரவரிசையில் இந்தியாவின் ஷபாலி வர்மா 6-ம் இடத்துக்கு முன்னேறியுள்ளார்.
தற்போது நடைபெற்று வரும் இலங்கைக்கு எதிரான சர்வதேச டி20 கிரிக்கெட் தொடரில் ஷபாலி வர்மா சிறப்பாக விளையாடி வருகிறார். இந்நிலையில் ஐசிசி நேற்று வெளியிட்டுள்ள டி20 வீராங்கனைகள் தரவரிசையில் 10-ம் இடத்திலிருந்து 6-ம் இடத்துக்கு ஷபாலி வர்மா முன்னேறியுள்ளார்.
இலங்கைக்கு எதிரான தொடரின் முதல் 4 போட்டிகளில் மட்டும் அவர் 236 ரன்களைக் குவித்துள்ளார். இந்திய வீராங்கனை ரிச்சா கோஷ் 20-வது இடத்துக்கு வந்துள்ளார். முதலிடத்தில் ஆஸ்திரேலிய வீராங்கனை பெத் மூனி 794 புள்ளிகளுடன் இருக்கிறார். 2-வது இடத்தில் மேற்கு இந்தியத் தீவுகள் அணி வீராங்கனை ஹேலி மேத்யூஸ் உள்ளார். ஸ்மிருதி மந்தனா 767 புள்ளிகளுடன் 3-வது இடத்தில் உள்ளார்.
பந்து வீச்சாளர்கள் தரவரிசையில் இந்திய வீராங்கனை தீப்தி சர்மா 783 புள்ளிகள் பெற்று முதலிடத்தில் உள்ளார். மற்ற இந்திய வீராங்கனைகள் ரேணுகா சிங் 6-வது இடத்திலும், ஸ்ரீசரணி 52-வது இடத்திலும் உள்ளனர்.
ஆல்-ரவுண்டர்கள் தரவரிசையில் மேற்கு இந்தியத் தீவுகள் அணி வீராங்கனை ஹேலி மேத்யூஸ் 505 புள்ளிகளுடன் முதலிடத்திலும், நியூஸிலாந்தின் அமேலியா கெர் 434 புள்ளிகளுடன் 2-வது இடத்திலும், இந்தியாவின் தீப்தி சர்மா 387 புள்ளிகளுடன் 3-ம் இடத்திலும் உள்ளனர்.
