உலக டென்னிஸ் லீக் தொடரில் மேத்வதேவ், ரைபகினா பங்கேற்பு

பெங்களூரு: உலக டென்னிஸ் லீக் தொடரின் 4-வது சீசன் வரும் டிசம்பர் 17ம் தேதி பெங்களூருவில் உள்ள எஸ்.எம்.கிருஷ்ணா டென்னிஸ் மைதானத்தில் தொடங்குகிறது.

கடந்த 2022-ம் ஆண்டு தொடங்கப்பட்ட இந்த தொடரின் முதல் 3 சீசன் போட்டிகளும் ஐக்கிய அரபு அமீரகத்தில் நடைபெற்றது. தற்போது முதன்முறையாக இந்தியாவில் நடைபெற உள்ளது.

4 நாட்கள் நடைபெறும் உலக டென்னிஸ் லீக்கில் அமெரிக்க ஓபன் முன்னாள் சாம்பியனான ரஷ்யாவின் டேனியல் மேத்வதேவ், ஆஸ்திரேலியாவின் நிக் கிர்ஜியோஸ், பிரான்சின் கேல் மோன்ஃபில்ஸ், 2022-ம் ஆண்டு விம்பிள்டன் மகளிர் ஒற்றையர் பிரிவில் பட்டம் வென்ற கஜகஸ்தானின் எலெனா ரைபகினா, ஸ்பெயினின் பவுலா படோசா உள்ளிட்ட நட்சத்திரங்கள் கலந்து கொள்வதை உறுதி செய்துள்ளனர்.

இவர்களுடன் ரோகன் போபண்ணா, சுமித் நாகல், யுகி பாம்ப்ரி, அங்கிதா ரெய்னா, வள்ளி பாமிடிபதி, மாயா ரேவதி உள்ளிட்ட இந்திய நட்சத்திரங்களும் கலந்து கொண்டு ரசிகர்களுக்கு விருந்தளிக்க உள்ளனர். இந்த தொடரில் கலந்து கொள்ளும் வீரர், வீராங்கனைகள் 4 அணிகளாக பிரிக்கப்படுவார்கள்.

போட்டிகள் ரவுண்ட் ராபின் முறையில் நடத்தப்படும். ஒவ்வொரு மோதலும் ஆடவர் ஒற்றையர், மகளிர் ஒற்றையர், 2 இரட்டையர் பிரிவு ஆட்டங்களை உள்ளடக்கியதாக இருக்கும். லீக் சுற்றின் முடிவில் முதல் இரு இடங்களை பிடிக்கும் அணிகள் இறுதிப் போட்டிக்கு முன்னேறும்.