சட்டோகிராம்: நியூஸிலாந்துக்கு எதிரான முதல் டி20 கிரிக்கெட் போட்டியில் வங்கதேச அணி 6 விக்கெட்கள் வித்தியாசத்தில் வெற்றி பெற்றது.
சட்டோகிராமில் நேற்று நடைபெற்ற இந்த ஆட்டத்தில் முதலில் பேட் செய்த நியூஸிலாந்து அணி 20 ஓவர்களில் 6 விக்கெட்கள் இழப்புக்கு 182 ரன்கள் குவித்தது. அதிகபட்சமாக டேன் கிளீவர் 28 பந்துகளில், ஒரு சிக்ஸர், 7 பவுண்டரிகளுடன் 51 ரன்களும், கேட்னி கிளார்க் 37 பந்துகளில், ஒரு சிக்ஸர், 7 பவுண்டரிகளுடன் 51 ரன்களும் சேர்த்தனர். கேப்டன் நிக் கெல்லி 39, ஜோஷ் கிளார்க்சன் 27 ரன்கள் எடுத்தனர்.
வங்கதேச அணி சார்பில் ரிஷாத் ஹோசைன் 2 விக்கெட்கள் கைப்பற்றினார். 183 ரன்கள் இலக்குடன் பேட் செய்த வங்கதேச அணி 18 ஓவர்களில் 4 விக்கெட்களை இழந்து 183 ரன்கள் எடுத்து வெற்றி பெற்றது. தவுஹித் ஹிர்தோய் 27 பந்துகளில், 3 சிக்ஸர்கள், 2 பவுண்டரிகளுடன் 51 ரன்களும், ஷாமின் ஹோசைன் 13 பந்துகளில், 2 சிக்ஸர்கள், 3 பவுண்டரிகளுடன் 31 ரன்களும் விளாசினர்.
பர்வேஷ் ஹோசைன் 28, கேப்டன் லிட்டன் தாஸ் 21, தன்ஸித் ஹசன் 20, சைஃப் ஹசன் 17 ரன்கள் சேர்த்தனர். ஆட்ட நாயகனாக தவுஹித் ஹிர்தோய் தேர்வானார். 6 விக்கெட்கள் வித்தியாசத்தில் வெற்றி பெற்ற வங்கதேச அணி 3 ஆட்டங்கள் கொண்ட டி 20 தொடரில் 1-0 என முன்னிலை வகிக்கிறது. 2-வது ஆட்டம் நாளை (29-ம் தேதி) நடைபெறுகிறது.
