மெல்பர்ன்: ஆஸ்திரேலிய ஓபன் கிராண்ட்ஸ்லாம் டென்னிஸ் போட்டியின் கால் இறுதிச் சுற்றுக்கு ஸ்பெயின் வீரர் கார்லோஸ் அல்கராஸ், பெலாரஸ் வீராங்கனை அரினா சபலென்கா ஆகியோர் முன்னேறியுள்ளனர்.
ஆண்டின் முதல் கிராண்ட்ஸ்லாம் போட்டியான ஆஸ்திரேலிய ஓபன் மெல்பர்ன் நகரில் நடைபெற்று வருகிறது. நேற்று நடைபெற்ற ஆடவர் ஒற்றையர் 4-வது சுற்றுப் போட்டியில் முதல் நிலை வீரரான கார்லோஸ் அல்கராஸும், அமெரிக்காவின் முன்னணி வீரரான டாமி பாலும் மோதினர்.
இதில் மிகச்சிறப்பாக விளையாடிய அல்கராஸ் 7-6 (8/6), 6-4, 7-5 என்ற கணக்கில் டாமி பாலை வீழ்த்தி கால் இறுதிச் சுற்றுக்கு முன்னேறினார். முதல் செட்டில், அல்கராஸுக்கு சவால் விடுக்கும் வகையில் புள்ளிகளை டாமி பால் குவித்தபோதிலும் செட்டை இழந்தார். இதைத் தொடர்ந்து 2, 3-வது செட்களிலும் அல்கராஸ் ஆதிக்கம் செலுத்தி வெற்றி கண்டார்.
மற்றொரு 4-வது சுற்று ஆட்டத்தில் ஆஸ்திரேலியாவைச் சேர்ந்தவரும், போட்டித் தரவரிசையில் 5-ம் நிலை வீரருமான அலெக்ஸ் டி மினாரும், போட்டி தரவரிசையில் 10-ம் நிலை வீரர் கஜகஸ்தானின் அலெக்ஸாண்டர் பப்ளிக்கும் மோதினர். இதில் அலெக்ஸ் டி மினார் 6-4, 6-1, 6-1 என்ற நேர் செட்களில் மிக எளிதாக வெற்றி கண்டார். இதன்மூலம் அலெக்ஸ் டி மினார் கால் இறுதிக்குத் தகுதி பெற்றார்.
மற்றொரு 4-வது சுற்று ஆட்டத்தில் ஜெர்மனி வீரரும், 3-ம் நிலையில் இருப்பவருமான அலெக்ஸாண்டர் ஜிவரேவ் 6-2, 6-4, 6-4 என்ற நேர் செட் கணக்கில் அர்ஜென்டினா வீரரும், போட்டியின் 18-ம் நிலை வீரருமான பிரான்சிஸ்கோ செருன்டோலாவை தோற்கடித்து கால் இறுதிச் சுற்றுக்கு முன்னேறினார்.
அமெரிக்க வீரரும், 25-ம் நிலை வீரருமான லேர்னர் டியனும், ரஷ்ய வீரரும், போட்டித் தரவரிசையில் 11-ம் நிலை வீரருமான டேனியல் மேத்வதேவும் மோதிய ஆட்டத்தில் லேர்னர் டியன் வெற்றி பெற்று கால் இறுதிச் சுற்றுக்கு முன்னேறினார். டியன் 6-4, 6-0, 6-3 என்ற செட் கணக்கில் மேத்வதேவை அதிர்ச்சித் தோல்வியுறச் செய்தார்.
ஜோகோவிச் முன்னேற்றம்: ஆடவர் ஒற்றையர் 4-வது சுற்றில் செர்பிய வீரர் ஜோகோவிச்சும், செக் குடியரசு வீரர் ஜாகுப் மென்சிக்கும் மோத இருந்தனர். காயம் காரணமாக 4-வது சுற்றிலிருந்து ஜாகுப் விலகியதையடுத்து கால் இறுதிச் சுற்றுக்கு ஜோகோவிச் முன்னேறினார்.
மகளிர் ஒற்றையர் பிரிவு 4-வது சுற்றுப் போட்டியில் முதல் நிலை வீராங்கனையான அரினா சபலென்கா 6-1, 7-6 (7/1) என்ற செட் கணக்கில் கனடாவின் விக்டோரியா போக்கோவைச் சாய்த்தார். மற்றொரு 4-வது சுற்று ஆட்டத்தில் அமெரிக்க வீராங்கனை இவா ஜோவிக் அபாரமாக விளையாடி 6-0, 6-1 என்ற கணக்கில் கஜகஸ்தான் வீராங்கனை யுலியா புடின்ட்சேவாவை வீழ்த்தினார்.
போட்டித் தரவரிசையில் 3-ம் நிலையில் இருப்பவரும், அமெரிக்காவைச் சேர்ந்தவருமான கோகோ காஃப் 6-1, 3-6, 6-3 என்ற செட் கணக்கில் செக் குடியரசின் கரோலினா முச்சோவாவை தோற்கடித்தார்.
