நகோயா: ஜப்பானின் ஐச்சி-நகோயா மாகாணத்தில் 5-வது ஆசிய பாரா விளையாட்டு போட்டி இன்று (18-ம் தேதி) தொடங்கி வரும் 24-ம் தேதி வரை நடைபெறுகிறது. தொடக்க விழா அணி வகுப்பில் இந்திய தேசியக் கொடியை பாரா பாட்மிண்டன் வீரர் பிரமோத் பகத், ஓட்டப்பந்தய வீராங்கனை சிம்ரன் சர்மா ஆகியோர் ஏந்திச் செல்கின்றனர்.
இந்த தொடரில் இந்தியா 11 விளையாட்டுப் பிரிவுகளில் சுமார் 168 வீரர், வீராங்கனைகளுடன் களமிறங்குகிறது. கடந்த 2023-ம் ஆண்டு சீனாவின் ஹாங்சோ நகரில் நடைபெற்ற போட்டியில் இந்தியாவில் இருந்து 303 பேர் பங்கேற்றிருந்தனர்.
அப்போது 29 தங்கம், 31 வெள்ளி, 51 வெண்கலம் என மொத்தம் 111 பதக்கங்களைக் கைப்பற்றி, பதக்கப் பட்டியலில் இந்தியா 5-வது இடத்தை பிடித்து இருந்தது. ஆசிய பாரா விளையாட்டுப் போட்டிகளில் இந்தியாவின் சிறந்த செயல்பாடாக இது அமைந்திருந்தது.
இம்முறை பங்கேற்கும் வீரர்களின் எண்ணிக்கை குறைந்ததற்கு, போட்டிகளில் பங்கேற்பதற்கான ஒதுக்கீடுகளில் செய்யப்பட்டுள்ள கட்டுப்பாடுகளும், போட்டி நிகழ்ச்சிகளில் ஏற்பட்டுள்ள மாற்றங்களும் காரணமாகக் கூறப்படுகின்றன. இதனால், முந்தைய போட்டியில் வென்ற 111 பதக்கங்களை மீண்டும் எட்டுவது இந்தியாவுக்கு கடினமாக இருக்கும் என எதிர்பார்க்கப்படுகிறது.
கடந்த முறை 4-வது இடத்தைப் பிடிக்கும் வாய்ப்பை இந்தியா ஒரு தங்கப் பதக்க வித்தியாசத்தில் தென் கொரியாவிடம் இழந்திருந்தது. இம்முறை அந்த இடத்தைப் பிடிப்பதற்கும் கடும் போட்டி நிலவும்.
இதற்கிடையே பாட்மிண்டன், கால்பந்து உள்ளிட்ட போட்டிகள் நேற்று முன்தினமே தொடங்கின. இதில் பாட்மிண்டனில் மகளிர் இரட்டையர் எஸ்எல்3-எஸ்யு5 பிரிவில் இந்தியாவின் மான்ஷி ஜோஷி, துளசிமதி முருகேசன் ஜோடி நேற்று 2-வது வெற்றியை பதிவு செய்து அரை இறுதிப் போட்டிக்கு முன்னேறி பதக்கம் வெல்வதை உறுதி செய்தது.
