Published : 04 Nov 2016 03:40 PM
Last Updated : 04 Nov 2016 03:40 PM
பெர்த் டெஸ்ட் போட்டியில் திடீர் எழுச்சியுற்று ஆஸ்திரேலியாவை குறைந்த ரன்களில் சுருட்டிய தென் ஆப்பிரிக்க அணிக்கு ஒரு பின்னடைவு ஏற்பட்டுள்ளது.
2-வது இன்னிங்சில் ஆஸ்திரேலியாவை அச்சுறுத்தி தென் ஆப்பிரிக்காவை வெற்றி பெறச் செய்து விடுவார் என்று எதிர்பார்த்த டேல் ஸ்டெய்ன் தோள்பட்டையில் எலும்பு முறிவு ஏற்பட்டதாக ஸ்கேன் அறிக்கை தெரிவிப்பதால் அவர் இந்த 3 டெஸ்ட் தொடரிலிருந்தே விலக நேரிட்டுள்ளது.
2-ம் நாளான இன்று டேல் ஸ்டெய்ன் நன்றாக வீசி டேவிட் வார்னரை 97 ரன்களில் வெளியேறச்செய்தார். ஆனால் அந்த ஓவருக்கு அடுத்த அவரது ஓவரில், அதாவது இன்னிங்சின் 38-வது ஓவரை ஸ்டெய்ன் வீசினார், அப்போது கவாஜா அவரை எதிர்கொண்டு ஆடி வந்தார்.
அப்போது 4-வது பந்தை வீசி முடித்தவுடன் தோள்பட்டையை பிடித்து கொண்டு சிறிது நேரம் குனிந்து நின்றார் டேல் ஸ்டெய்ன், பிறகு பெவிலியன் திரும்பினார்.
தற்போது அவருக்கு ஸ்கேன் எடுக்கப்பட்டு அதில் எலும்பு முறிவு ஏற்பட்டுள்ளது தெரியவந்துள்ளதால் இந்தத் தொடரில் மேலும் ஆட முடியாத நிலை ஏற்பட்டுள்ளது.
அவருக்குப் பதிலாக வேறொரு வீரரை தென் ஆப்பிரிக்கா அனுப்பும் என்று எதிர்பார்க்கலாம்.
இந்நிலையில் தென் ஆப்பிரிக்கா தனது 2-வது இன்னிங்சில் 2-ம் நாள் ஆட்ட முடிவில் 2 விக்கெட்டுகள் இழப்பிற்கு 104 ரன்கள் எடுத்துள்ளது. தொடக்க வீரர் டீன் எல்கர் 4 பவுண்டரிகள் 1 சிக்சருடன் 46 ரன்கள் எடுத்தும் டுமினி 6 பவுண்டரிகளுடன் 34 ரன்கள் எடுத்தும் களத்தில் உள்ளனர்.
முன்னதாக குக் 2 பவுண்டரிகளுடன் 12 ரன்கள் எடுத்து சிடில் வீசிய தலையுயர பவுன்சரை மிட்விக்கெட்டில் கேட்ச் கொடுத்து வெளியேறினார். ஹஷிம் ஆம்லா 1 ரன் எடுத்து ஹேசில்வுட்டின் உள்ளே வந்த பந்தை கட் செய்ய முயன்று பவுல்டு ஆனார்.
அதன் பிறகு எல்கரும், டுமினியும் சேர்ந்து ஆட்டமிழக்காமல் இன்றைய தினம் மேலும் 59 ரன்களைச் சேர்த்து களத்தில் உள்ளனர்.
Sign up to receive our newsletter in your inbox every day!
WRITE A COMMENT