பயிற்சியில் தோனி காயம்: முன்னெச்சரிக்கையாக பார்த்திவ் படேல் அணியுடன் இணைகிறார்

வங்கதேசத்தில் நடைபெறும் ஆசியக் கோப்பை டி20 கிரிக்கெட்டுக்காக பயிற்சியில் ஈடுபட்டிருந்த தோனிக்கு முதுகில் தசைப் பிடிப்பு ஏற்பட்டது. இதனால் எச்சரிக்கை நடவடிக்கையாக விக்கெட் கீப்பர்/பேட்ஸ்மென் பார்த்திவ் படேல் இந்திய அணிக்கு அழைக்கப்பட்டுள்ளார்.

இது குறித்து பிசிசிஐ செயலர் அனுராக் தாக்கூர் அறிக்கை ஒன்றில் கூறியிருப்பதாவது:

“இந்திய ஒருநாள் மற்றும் டி20 அணியின் கேப்டன் தோனிக்கு பயிற்சியின் போது முதுகில் தசைப்பிடிப்பு ஏற்பட்டது. இதனையடுத்து முன்னெச்சரிக்கை நடவடிக்கையாக பார்த்திவ் படேல் அணிக்கு அழைக்கப்பட்டுள்ளார். இவர் டாக்காவில் அணியுடன் விரைவில் இணையவிருக்கிறார்” என்று கூறப்பட்டுள்ளது.

2011-ம் ஆண்டில் இரண்டு டி20 போட்டிகளில் பார்த்திவ் படேல ஆடியுள்ளார். இவர் உள்நாட்டு கிரிக்கெட்டில் தொடர்து தன்னை நிரூபித்து வருகிறார்.

ஆசியக்கோப்பை டி20-யைத் தொடர்ந்து உலகக்கோப்பை டி20 இருப்பதால் தோனியின் உடற்தகுதி அணிக்கு மிக முக்கியம் என்பதால் பாதுகாப்பாக பார்த்திவ் படேல் அழைக்கப்பட்டுள்ளதாக கிரிக்கெட் வாரிய வட்டாரங்கள் தெரிவிக்கின்றன.