Published : 01 Aug 2021 06:28 AM
Last Updated : 01 Aug 2021 06:28 AM

ஒலிம்பிக் - வட்டு எறிதல் இறுதி சுற்றில் கமல்பிரீத் கவுர்: பாட்மிண்டன் அரை இறுதியில் பி.வி.சிந்து தோல்வி

கமல்பிரீத் கவுர்

டோக்கியோ

டோக்கியோ ஒலிம்பிக்கில் மகளிருக்கான வட்டு எறிதலில் இந்தியாவின் கமல்பிரீத் கவுர் இறுதிச் சுற்றுக்கு முன்னேறினார். பாட்மிண்டன் அரை இறுதியில் பி.வி.சிந்து, குத்துச்சண்டையில் அமித் பங்கால் ஆகியோர் தோல்வி அடைந்தனர்.

டோக்கியோ ஒலிம்பிக் திருவிழாவின் 9-வது நாளான நேற்று மகளிருக்கான வட்டு எறிதல் தகுதிச் சுற்றில் இந்தியாவின் கமல்பிரீத் கவுர் தனது 3-வது முயற்சியில் 64 மீட்டர் தூரம் எறிந்து 2-வது இடம் பிடித்து இறுதிச் சுற்றுக்கு முன்னேறினார். மகளிருக்கான ஹாக்கி ஏ பிரிவில் இடம் பிடித்திருந்த இந்திய அணி தனது கடைசிலீக் ஆட்டத்தில் 4-3 என்ற கோல் கணக்கில் தென் ஆப்பிரிக்காவை வீழ்த்தியது. இந்திய அணி சார்பில் வந்தனா கட்டாரியா 3 கோல்களும் நேகா ஒரு கோலும் அடித்தனர். இந்திய அணிக்கு இது 2-வது வெற்றியாக அமைந்தது. இதனால் இந்திய மகளிர் அணி லீக் சுற்றில் 4-வது இடம் பிடித்து கால் இறுதிச் சுற்றுக்கு தகுதி பெற்றது.

துப்பாக்கி சுடுதலில் மகளிருக்கான 50 மீட்டர் ரைபிள் 3 பொசிஷன் பிரிவில் இந்தியாவின் அஞ்சும் மவுத்கில், தேஜஸ்வினி சாவந்த் ஆகியோர் இறுதிச் சுற்றுக்கு தகுதிபெறத் தவறினர்.

ஆடவருக்கான குத்துச்சண்டை யில் பிளைவெயிட் பிரிவில் கால்இறுதிக்கு முந்தைய சுற்றில் உலகத்தரவரிசையில் முதலிடத்தில் உள்ள இந்தியாவின் அமித் பங்கால் 1-4 என்ற கணக்கில் கொலம்பியாவின் ஹெர்னி மார்டினெஸிடம் தோல்வியடைந்தார். ஆடவருக்கான வில்வித்தையில் கால் இறுதிக்கு முந்தைய சுற்றில் இந்தியாவின் அதானு தாஸ் 4-6 என்ற கணக்கில் ஜப்பானின் ஃபுருகவாவிடம் வீழ்ந்தார்.

பாட்மிண்டனில் மகளிருக்கான ஒற்றையர் பிரிவு அரை இறுதியில் இந்தியாவின் பி.வி.சிந்து, சீன தைபேவின் தை சூ-யிங்கை எதிர்கொண்டார். இதில் சிந்து 18-21, 12-21 என்ற நேர் செட் கணக்கில் தோல்வியடைந்தார். அரை இறுதியில் தோல்வியடைந்த சிந்து, வெண்கலப் பதக்கத்துக்கான ஆட்டத்தில் சீனாவின் ஹி பிங் ஜியாவோவுடன் மோதுகிறார். மகளிருக்கான மிடில்வெயிட் குத்துச்சண்டையில் இந்தியாவின் பூஜா ராணி கால் இறுதிச் சுற்றில் 0-5 என்ற கணக்கில் சீனாவின் கியான் லியிடம் தோல்வியடைந்தார்.

FOLLOW US

Sign up to receive our newsletter in your inbox every day!

WRITE A COMMENT
 
x