விளையாட்டாய் சில கதைகள்: மியான்தாத் அடித்த சிக்ஸர்

இந்தியா - பாகிஸ்தான் கிரிக்கெட் வரலாற்றில், மறக்க முடியாத நாள் ஏப்ரல் 18, 1986.

இந்தியா - பாகிஸ்தான் நாடுகளுக்கு இடையேயான போட்டிகளில் 1986-ம் ஆண்டுவரை இந்தியாவின் பக்கமே காற்று வீசிக்கொண்டு இருந்தது. இரு நாடுகளுக்கு இடையிலான போட்டிகளில் அதிகமாக இந்தியாவே ஜெயித்துக்கொண்டு இருந்தது. அந்தக் காற்றை பாகிஸ்தான் பக்கம் ஜாவீத் மியான்தாத் திருப்பிய நாள் என்று இந்நாளைச் சொல்லலாம்.

1986-ம் ஆண்டு ஷார்ஜாவில் நடந்த ஆஸ்திரல் - ஏஷியா கோப்பைக்கான இறுதிப் போட்டியில் இந்தியாவும் பாகிஸ்தானும் மோதின. இதில் முதலில் பேட்டிங் செய்த இந்திய அணி, 50 ஓவர்களில் 245 ரன்களை எடுத்தது. அடுத்து வந்த பாகிஸ்தான் அணி 2 விக்கெட் இழப்புக்கு 39 ரன்களை எடுத்திருந்த நேரத்தில் மியான்தாத் களம் இறங்கினார். ஒருபுறம் பாகிஸ்தான் அணி வரிசையாய் விக்கெட்களை இழக்க, மறுபுறம் தூண்போல் உறுதியாய் நின்றார் மியான்தாத்.

இப்போட்டியின் கடைசி ஓவரில் பாகிஸ்தான் வெற்றிபெற 8 ரன்கள் தேவைப்பட்டன. கடைசி ஓவரை வீச வந்த சேதன் சர்மா, முதல் 5 பந்துகளில் 4 ரன்களை மட்டுமே விட்டுக்கொடுத்தார். கடைசி பந்தில் வெற்றிக்கு 4 ரன்கள் தேவை என்ற நிலையில் சேதன் சர்மா வீசிய பவுன்ஸரை சிக்ஸருக்கு விரட்டினார் ஜாவித் மியான்தத். இப்போட்டியில் 116 ரன்கள் குவித்து, பாகிஸ்தானை வெற்றிபெறச் செய்தார்.

இந்தப் போட்டியில் ஏற்பட்ட தோல்வியின் தாக்கம், பல ஆண்டுகளுக்கு இந்தியாவை பாதித்தது. 2000-ம் ஆண்டில் கேப்டன் கங்குலி தலையெடுத்த பின்னரே இந்திய அணி பாகிஸ்தானை மீண்டும் வெல்லத் தொடங்கியது. பின்னர் தோனியின் காலத்தில், பாகிஸ்தான் மீது இந்தியா ஆதிக்கம் செலுத்தியது.