இலங்கைக்கு எதிரான டுனிடின் டெஸ்டில் நியூஸிலாந்து முதல் இன்னிங்ஸில் 96.1 ஓவரில் 431 ரன்கள் சேர்த்து ஆட்டமிழந்தது. தொடர்ந்து ஆடிய இலங்கை நேற்றைய 2வது நாள் ஆட்டம் முடிவில் 4 விக்கெட் இழப்புக்கு 197 ரன்கள் எடுத்தது.
முதல் நாள் ஆட்டத்தில் நியூஸிலாந்து அணி 8 விக்கெட் இழப்புக்கு 409 ரன்கள் குவித்தது. மார்ட்டின் குப்தில் 156, வில்லியம்சன் 88, மெக்குலம் 75 ரன் எடுத்தனர். பிரேஷ்வெல் 32, வாக்னர் ரன் எதும் எடுக்காத நிலையில் களத்தில் இருந்தனர். நேற்று 2வது நாள் ஆட்டத்தை இருவரும் தொடர்ந்தனர்.
வாக்னர் 7, பிரேஷ்வெல் 47 ரன்னில் ஆட்டமிழக்க நியூஸிலாந்து அணியின் முதல் இன்னிங்ஸ் 96.1 ஓவரில் 431 ரன்களுக்கு முடிந்தது. இலங்கை தரப்பில் நுவன் பிரதீப் 4, லக்மல், ஷமீரா தலா 2 விக்கெட் கைப்பற்றினர்.
தொடர்ந்து பேட் செய்த இலங்கை அணி நேற்றைய ஆட்ட நேரம் முடிவில் 81 ஓவரில் 4 விக்கெட் இழப்புக்கு 197 ரன்கள் எடுத்தது. கருணாரத்னே 88, மென்டிஸ் 8, ஜெயசுந்தரா 1, மேத்யூஸ் 2 ரன்களில் ஆட்டமிழந்தனர். சண்டிமால் 83, விதாங்கே 10 ரன்னுடன் களத்தில் உள்ளனர்.
நியூஸி. தரப்பில் டிம் சவுதி, பவுல்ட், வாக்னர், ஷான்டர் தலா 1 விக்கெட் கைப்பற்றினர். கைவசம் 6 விக்கெட்கள் இருக்க இலங்கை அணி 234 ரன்கள் பின்தங்கியுள்ளது. இன்று 3வது நாள் ஆட்டம் நடைபெறுகிறது.