ஆண்டின் கடைசி கிராண்ட்ஸ்லாம் போட்டியான அமெரிக்க ஓபன் டென்னிஸ் போட்டியின் கலப்பு இரட்டையர் அரையிறுதியில் இந்தியாவின் லியாண்டர் பயஸ் - சுவிட்சர்லாந்தின் மார்ட்டினா ஹிங்கிஸ் ஜோடியும், இந்தியாவின் ரோஹன் போபண்ணா - சீன தைபேவின் யங் ஜன் சான் ஜோடியும் மோதுகின்றன.
பயஸ் - ஹிங்கிஸ் ஜோடியை எதிர்த்து விளையாடவிருந்த ருமேனியாவின் சைமோனா ஹேலப் - ஹாரியா டீக்காவ் ஜோடி போட்டியிலிருந்து விலகியதால் பயஸ் ஜோடி காலிறுதியில் விளையாடாமலேயே அரையிறுதிக்கு முன்னேறியது.
போபண்ணா - யங் ஜன் சான் ஜோடி தங்களின் காலிறுதியில் 7-6 (7), 5-7, 13-11 என்ற செட் கணக்கில் சீனா தைபேவின் சூ வெய் - பின்லாந்தின் ஹென்றி கான்டினென் ஜோடியைத் தோற்கடித்தது.
இதனிடையே, ஆடவர் இரட்டையர் பிரிவில் இந்தியாவின் ரோஹன் போபண்ணா - ருமேனியாவின் புளோரின் மெர்ஜியா ஜோடி காலிறுதிக்கு முன்னேறியுள்ளது.
இந்த ஜோடி தங்களின் முந்தைய சுற்றில் 6-7 (4), 6-4, 6-3 என்ற செட் கணக்கில் கனடாவின் டேனியல் நெஸ்டர்-பிரான்ஸின் எட்வர்ட் ரோஜர் வேஸலின் ஜோடியைத் தோற்கடித்தது. போபண்ணா ஜோடி தங்களின் காலிறுதியில் பிரிட்டனின் டொமினிக் இங்லாட்-ஸ்வீடனின் ராபர்ட் லின்ட்ஸ்டெட் ஜோடியை எதிர்கொள்கிறது.
இதனிடையே, ஒற்றையர் பிரிவின் 4-வது சுற்றில் பிரிட்டனின் ஆன்டி முர்ரே அதிர்ச்சி தோல்வி கண்டார். கடந்த 5 ஆண்டுகளில் கிராண்ட்ஸ்லாம் போட்டியில் ஆரம்ப கட்ட சுற்றில் முர்ரே தோற்றது இதுவே முதல்முறையாகும்.
அதேநேரத்தில் ஸ்விட்சர்லாந்து வீரர்களான ரோஜர் ஃபெடரர், ஸ்டானிஸ்லஸ் வாவ்ரிங்கா, ருமேனிய வீராங்கனை சைமோனா ஹேலப், பெலாரஸின் விக்டோரியா அசரென்கா ஆகியோர் காலிறுதிக்கு முன்னேறியுள்ளனர்.