ஐசிசி டி 20 தரவரிசையில் கே.எல்.ராகுல், விராட் கோலி முன்னேற்றம்

சர்வதேச டி 20 கிரிக்கெட் வீரர்களுக்கான தரவரிசை பட்டியலை ஐசிசி வெளியிட்டுள்ளது. இதில் இந்திய அணியின் தொடக்க வீரரான கே.எல்.ராகுல், கேப்டன் விராட் கோலி ஆகியோர் முன்னேற்றம் கண்டுள்ளனர்.

இந்தியா - இலங்கை அணிகள் இடையிலான டி 20 தொடர் முடிவடைந்துள்ள நிலையில் தரவரிசைபட்டியலை ஐசிசி நேற்று வெளியிட்டது. இதில் பேட்ஸ்மேன்களுக்கான தரவரிசையில் கே.எல்.ராகுல் 760 புள்ளிகளுடன் 6-வதுஇடத்தை பிடித்துள்ளார். இலங்கைக்கு எதிரான 2 ஆட்டங்களில் கே.எல்.ராகுல் 45 மற்றும் 54 ரன்கள்சேர்த்திருந்தார். இதன் மூலம் அவருக்கு 26 புள்ளிகள் கிடைத்திருந்தது.

விராட் கோலி ஒரு இடம் முன்னேறி 9-வது இடத்தில் உள்ளார். புனே ஆட்டத்தில் அரை சதம் அடித்த மற்றொரு தொடக்க வீரரான ஷிகர் தவண் ஒரு இடம் முன்னேறி 15-வது இடத்தை பிடித்துள்ளார். மணீஷ் பாண்டே 4 இடங்கள் முன்னேறி 70-வது இடத்தில் உள்ளார்.

பந்து வீச்சாளர்களுக்கான தரவரிசையில் இந்தியாவின் நவ்தீப் சைனி 146-வது இடத்தில் இருந்து 98-வது இடத்துக்கு முன்னேறியுள்ளார். ஷர்துல் தாக்குர் 92-வது இடத்தில் உள்ளார். இவர்கள் இருவரும் இலங்கை அணிக்கு எதிரான டி 20 தொடரில் தலா 5 விக்கெட்களை கைப்பற்றியிருந்தனர். ஜஸ்பிரித் பும்ரா 8 இடங்கள் முன்னேறி 39-வது இடத்தை பிடித்துள்ளார்.

அணிகளுக்கான தரவரிசையில் இந்திய அணிக்கு கூடுதலாக இரு புள்ளிகள் கிடைத்துள்ள போதிலும் 260 புள்ளிளுடன் 5-வது இடத்தில் தொடர்கிறது. அதேவேளையில் டி 20 தொடரை இழந்துள்ள இலங்கை அணி 2 புள்ளிளை இழந்து 236 புள்ளிகளுடன் 8-வது இடத்தில் உள்ளது. - பிடிஐ