விம்பிள்டன் டென்னிஸ்: சஃபரோவா அதிர்ச்சி தோல்வி

கிராண்ட்ஸ்லாம் போட்டிகளில் ஒன்றான விம்பிள்டன் டென்னிஸ் போட்டியின் காலிறுதிக்கு முந்தைய சுற்றில் போட்டித் தரவரிசையில் 6-வது இடத்தில் இருந்த செக்.குடியரசின் லூஸி சஃபரோவா அதிர்ச்சி தோல்வி கண்டார்.

லண்டனில் நடைபெற்று வரும் இந்தப் போட்டியில் சர்வதேச தரவரிசையில் 47-வது இடத்தில் இருக்கும் அமெரிக்காவின் கோகோ வந்தேவ்கே 7-6 (1), 7-6 (4) என்ற நேர் செட்களில் சஃபரோவாவைத் தோற்கடித்தார்.

விம்பிள்டனில் முதல்முறை யாக காலிறுதிக்கு முன்னேறியி ருக்கும் கோகா, அடுத்ததாக ரஷ்யாவின் மரியா ஷரபோவாவை சந்திக்கவுள்ளார். போட்டித் தரவரிசையில் 4-வது இடத்தில் இருக்கும் ஷரபோவா தனது காலிறுதிக்கு முந்தைய சுற்றில் 6-4, 6-4 என்ற நேர் செட்களில் கஜகஸ்தானின் ஜெரீனா டியாஸை தோற்கடித்தார்.

உலகின் முதல் நிலை வீராங்கனையான அமெரிக்காவின் செரீனா வில்லியம்ஸ் 6-4, 6-3 என்ற நேர் செட்களில் தனது சகோதரி வீனஸ் வில்லியம்ஸை வீழ்த்தி காலிறுதிக்கு முன்னேறினார். விம்பிள்டனில் 6-வது பட்டம் வெல்வதில் தீவிரம் காட்டி வரும் செரீனா 67 நிமிடங்களில் போட்டியை முடிவுக்கு கொண்டு வந்தார். அவர் இந்த ஆட்டத்தில் 10 ஏஸ் சர்வீஸ்களை பறக்கவிட்டார். இதுவரை வீனஸுடன் 26 முறை மோதியுள்ள செரீனா 14-வது வெற்றியைப் பதிவு செய்துள்ளார்.

மற்றொரு காலிறுதிக்கு முந்தைய சுற்றில் அமெரிக்காவின் மேடிசன் கீஸ் 3-6, 6-4, 6-1 என்ற செட் கணக்கில் பெலாரஸின் தகுதி நிலை வீராங்கனை ஓல்காவை வீழ்த்தி காலிறுதிக்கு முன்னேறினார்.

ஆடவர் ஒற்றையர் பிரிவு காலிறுதிக்கு முந்தைய சுற்றில் பிரான்ஸின் ரிச்சர்ட் காஸ்கட் 7-5, 6-1, 6-7 (7), 7-6 (6) என்ற செட் கணக்கில் ஆஸ்திரேலியாவின் நிக் கிர்ஜியோஸைத் தோற்கடித்தார். இதன்மூலம் கடந்த விம்பிள்டனில் நிக்கிடம் கண்ட தோல்விக்கு பதிலடி கொடுத்துள்ளார்.

மற்றொரு ஆடவர் காலிறுதிக்கு முந்தைய சுற்றில் கனடாவின் வசேக் போஸ்பிஸில் 4-6, 6-7 (4), 6-4, 6-3, 6-3 என்ற செட் கணக்கில் செர்பியாவின் விக்டர் டிராய்க்கியைத் தோற்கடித்தார். இதன்மூலம் விம்பிள்டனில் காலிறுதிக்கு முன்னேறிய 3-வது கனடா வீரர் என்ற பெருமையை அவர் பெற்றுள்ளார். இதற்கு முன்னர் கனடாவைச் சேர்ந்த ராபர்ட் பாவெல் (1908, 1910, 1912), மிலோஸ் ரயோனிச் (2014) ஆகியோர் மட்டுமே விம்பிள்ட னில் காலிறுதிக்கு முன்னேறியிருக் கின்றனர்.