பாகிஸ்தானுக்குப் பின்னடைவு: 7 அடி உயர மொகமது இர்பான் விலகல்

உலகக்கோப்பை கிரிக்கெட் காலிறுதிக்கு முன்னேறியுள்ள நிலையில் பாகிஸ்தான் அணியின் 7 அடி உயர வேகப்பந்து வீச்சாளர் மொகமது இர்ஃபான் காயம் காரணமாக உலகக்கோப்பை கிரிக்கெட்டில் தொடர முடியாத நிலை ஏற்பட்டுள்ளது.

அடிவயிற்றுப் பகுதியில் மொகமது இர்ஃபானுக்கு காயம் ஏற்பட்டதன் காரணமாக அவர் இந்த உலகக்கோப்பையில் விளையாட முடியாது என்று கூறிய பாகிஸ்தான் அணி நிர்வாகம், ஆஸ்திரேலியாவுக்கு எதிரான காலிறுதியில் வெற்றி பெற்ற பிறகு அவருக்கு மாற்று வீரரை களமிறக்கலாம் என்று தெரிகிறது.

ஏற்கெனவே, பாகிஸ்தான் அணி மொகமது ஹபீஸ், மற்றும் ஜுனைத் கான் காயங்களினால் இந்த உலகக்கோப்பையில் சற்றே பின்னடைவு கண்டுள்ள நிலையில் தற்போது நன்றாக வீசி வந்த மொகமது இர்ஃபானும் ஆட முடியாமல் போயுள்ளது.

4 வேகப்பந்து வீச்சாளர்களுடன் பாகிஸ்தான் ஆடி வருகிறது. ஏற்கெனவே அயர்லாந்துக்கு எதிரான போட்டியில் இர்ஃபான் விளையாட முடியாத நிலை ஏற்பட்ட போது ஈஷன் அடில் என்ற வேகப்பந்து வீச்சாளரை பாகிஸ்தான் அணியில் சேர்த்தது குறிப்பிடத்தக்கது.