கிரானைட் ஓபன்: காலிறுதியில் தீபிகா, ஜோஷ்னா

கிரானைட் ஓபன் ஸ்குவாஷ் போட்டியில் இந்திய வீராங்கனைகள் தீபிகா பலிக்கல், ஜோஷ்னா சின்னப்பா ஆகியோர் காலிறுதிக்கு முன்னேறியுள்ளனர்.

கனடாவின் டோரன்டோ நகரில் நடைபெற்று வரும் இந்தப் போட்டியில் நேற்று முன்தினம் நடைபெற்ற காலிறுதிக்கு முந்தைய சுற்றில் போட்டித் தரவரிசையில் 3-வது இடத்தில் உள்ள தீபிகா பலிக்கல் 8-11, 11-8, 11-5, 11-7 என்ற செட் கணக்கில் வேல்ஸின் தேஸ்னி இவான்ஸை தோற்கடித்தார்.

தீபிகா தனது காலிறுதியில் இங்கிலாந்தின் ஜென்னி டங்காஃபை சந்திக்கவுள்ளார்.

மற்றொரு காலிறுதிக்கு முந்தைய சுற்றில் அபாரமாக ஆடிய ஜோஷ்னா சின்னப்பா 11-8, 11-8, 11-6 என்ற நேர் செட்களில் கனடாவின் வைல்ட்கார்ட் வீராங்கனையான நிக்கி டோடை தோற்கடித்தார். ஜோஷ்னா, தனது காலிறுதியில் முன்னாள் முதல் நிலை வீராங்கனையான ரஹேல் கிரின்ஹாமை சந்திக்கிறார்.