அனைத்து வடிவங்களிலும் இலங்கைக்கு எதிராக 100 போட்டிகளில் வென்ற இந்தியா

இலங்கை அணிக்கு எதிரான ஒருநாள் கிரிக்கெட் தொடரை இந்தியா 5-0 என்று கைப்பற்றியதையடுத்து, ஒருநாள், டெஸ்ட், டி20 என்று அனைத்து சர்வதேச போட்டிகளிலும் சேர்த்து மொத்தமாக இந்தியா இலங்கையை 100 போட்டிகளில் வென்றுள்ளது.

டெஸ்ட் போட்டிகளில் 14 முறையும், டி20 கிரிக்கெட்டில் 3 முறையும், ஒருநாள் சர்வதேச போட்டிகளில் 83 முறையும் இந்தியா வென்று 100 போட்டிகளில் இலங்கையை இந்தியா வென்றுள்ளது.

இந்திய மண்ணில் இருதரப்பு ஒருநாள் போட்டித் தொடரில் இலங்கை இந்தியாவுக்கு எதிராக தொடரை வென்றதில்லை. 1982-ஆம் ஆண்டு முதன்முதலில் இந்தியாவில் 2 ஒருநாள் போட்டிகளில் இலங்கை விளையாடியது. ஆனால் அதில் இந்தியா 2-0 என்று வெற்றி பெற்றது.

மிகச்சிறந்த வீரர்களை இலங்கை அணி உருவாக்கி இந்தியாவில் வந்து விளையாடிய போதும் ஒருநாள் தொடரில் வெற்றி என்பது இன்று வரையிலும் இலங்கை அணிக்கு இந்திய மண்ணில் லபிக்கவில்லை.

இலங்கை அணிக்கு எதிராக இந்தியா அதிகமாக ஒருநாள் போட்டிகளில் விளையாடுகிறது.

இலங்கைக்கு எதிராக மொத்தம் 190 சர்வதேச போட்டிகளை அனைத்து வடிவங்களிலும் இந்தியா விளையாடியதில் 100 போட்டிகளில் வென்றுள்ளது.

இங்கிலாந்துக்கு எதிராக மொத்தம் 211 போட்டிகளில் 74-ல் வென்றுள்ளது.

அடுத்ததாக மே.இ.தீவுகளுக்கு எதிராக மொத்தம் 209 போட்டிகளில் 70 போட்டிகளில் வென்றுள்ளது.

ஆஸ்திரேலியாவுக்கு எதிராக 210 போட்டிகளில் 69-ல் வென்றுள்ளது.

பாகிஸ்தானுக்கு எதிராக 191 போட்டிகளில் 63-ல் மட்டும் வெற்றி கண்டுள்ளது.

தென் ஆப்பிரிக்காவுக்கு எதிராக 107 போட்டிகளில் 38-ல் வென்றுள்ளது.