ஐபிஎல் தொடரில் இன்று இரவு 8 மணிக்கு மொகாலியில் நடைபெறும் ஆட்டத்தில் இரு முறை சாம்பியனான கொல்கத்தா நைட் ரைடர்ஸ், கிங்ஸ் லெவன் பஞ்சாப் அணியுடன் மோதுகிறது.
அடுத்தடுத்து இரு தோல்விகளை சந்தித்து நெருக்கடிக்கு உள்ளான கொல்கத்தா அணி தனது கடைசி ஆட்டத்தில் பெங்களூரு அணியை 6 விக்கெட்கள் வித்தியாசத்தில் எளிதாக வீழ்த்தி இழந்த பார்மை மீட்டுள்ளது.
கவுதம் காம்பீர் தலைமையிலான கொல்கத்தா அணி 12 ஆட்டத்தில் விளையாடி 8 வெற்றி, 4 தோல்விகளுடன் 16 புள்ளிகள் பெற்று பட்டியலில் 2-வது இடத்தில் உள்ளது. பிளே ஆப் சுற்றுக்கு முன்னேறுவதை அந்த அணி ஏறக்குறைய உறுதி செய்துள்ளது. எனினும் இன்றைய ஆட்டத்தில் பஞ்சாப் அணியை வீழ்த்தினால் மற்ற அணிகளுடன் மல்லுக்கட்டாமல் எளிதாக பிளே ஆப் சுற்றில் கால் பதித்து விடலாம். இதனால் கொல்கத்தா அணி மிகுந்த கவனத்துடன் விளையாடக்கூடும் என கருதப்படுகிறது.
கொல்கத்தா அணி நேற்று முன்தினம் பெங்களூருக்கு எதிரான ஆட்டத்தில் பவர் பிளேவில் நம்ப முடியாத வகையில் 105 ரன்கள் விளாசி சாதனை படைத்திருந்ததுடன் 159 ரன்கள் இலக்கை 29 பந்துகள் மீதம் இருக்க வெற்றி பெற்று அசத்தியது.
இந்த ஆட்டத்தில் 15 பந்துகளில் அரை சதம் விளாசிய சுனில் நரேன், அதிவேக அரை சதம் அடித்திருந்த யூசுப் பதானின் சாதனையை சமன் செய்திருந்தார். அவருக்கு உறுதுணையாக விளை யாடிய கிறிஸ் லின் 22 பந்து களில் 50 ரன்கள் குவித்திருந்தார்.
இவர்கள் இருவருடன் காம்பீர், ராபின் உத்தப்பா, மணீஷ் பாண்டே, யூசுப் பதான், காலின் டி கிராண் ட்ஹோம் ஆகியோரும் பேட்டிங்கில் வலுசேர்ப்பவர்களாக உள்ளனர். பந்து வீச்சில் உமேஷ் யாதவ், கிறிஸ்வோக்ஸ், சுனில் நரேன் ஆகியோர் எதிரணிக்கு சவால் விடுக்கும் வகையில் செயல்பட்டு வருகின்றனர். இவர்களுக்கு குல்தீவ் யாதவ், பியூஸ் சாவ்லா அனிகெட் ராஜ்புத் ஆகியோரும் உதவியாக உள்ளனர்.
மேக்ஸ்வெல் தலைமையிலான பஞ்சாப் அணி 11 ஆட்டத்தில், 5 வெற்றி, 6 தோல்விகளுடன் 10 புள்ளிகள் பெற்று பட்டியலில் 5-வது இடத்தில் உள்ளது. அந்த அணி பிளே ஆப் சுற்றுக்கு முன்னேறுவதற்கான வாய்ப்பு குறைந்த அளவிலேயே உள்ளது. இன்றைய ஆட்டம் உட்பட எஞ்சியுள்ள 3 ஆட்டங்களிலும் பெரிள அளவிலான வெற்றியை வசப்படுத்தினாலும் மற்ற அணிகளின் வெற்றி, தோல்விகளை பொறுத்துதான் பஞ்சாப் அணியின் தலைவிதி நிர்ணயமாகும்.
அடுத்தடுத்து வெற்றிகளை பெற்ற பஞ்சாப் அணி கடைசியாக நேற்றுமுன்தினம் குஜராத் அணிக்கு எதிரான ஆட்டத்தில் சொந்த மைதா னத்தில் 6 விக்கெட்கள் வித்தியா சத்தில் தோல்வியை சந்தித்தது. இந்த தோல்வி அந்த அணியின் பிளே ஆப் சுற்றுக்கான வாய்ப்பை பாதித்துள்ளது.
ஹசிம் ஆம்லா மீண்டும் சிறப்பாக விளையாடி 104 ரன்கள் விளாசிய நிலையில் 189 ரன்களை இலக்காக கொடுத்த போதும் பஞ்சாப் அணியின் பந்து வீச்சாளர்கள் குஜராத் அணியின் ரன் குவிப்பை கட்டுப்படுத்த தவறினர்.
மேலும் பீல்டிங்கிலும் பஞ்சாப் அணி வீரர்கள் மோசமாக செயல் பட்டனர். 39 பந்துகளில் 74 ரன்கள் குவித்து வெற்றியை பறித்துச் சென்ற டிவைன் ஸ்மித் கொடுத்த 2 கேட்ச்களை பஞ்சாப் வீரர்கள் கோட்டை விட்டனர். இது ஆட்டத்தின் முடிவில் பெரிய பாதிப்பை ஏற்படுத்தியது.
குஜராத் அணிக்கு எதிரான தோல்வியால் எஞ்சி உள்ள 3 ஆட்டங்களும் பஞ்சாப் அணிக்கு நாக்-அவுட் போட்டியாக மாறி உள்ளது. இவற்றில் ஒரு ஆட்டத்தில் தோல்வியடைந்தாலும் தொடரில் இருந்து மூட்டை கட்ட வேண்டியதுதான். கொல்கத்தாவை இன்று எதிர்கொள்ளும் பஞ்சாப் அணி தனது கடைசி இரு ஆட்டங்களில் மும்பை, புனே அணிகளை எதிர்கொள்கிறது.
ஹசிம் ஆம்லா இந்த சீசனில் தலா 2 சதம், 2 அரை சதங்களுடன் 420 ரன்கள் குவித்து நல்ல பார்மில் உள்ளார். அதிரடி வீரர்களான மேக்ஸ்வெல், மார்ட்டின் கப்தில், ஷான் மார்ஷ், மனன் வோரா, அக் ஷர் படேல் ஆகியோர் ஒரு சேர திறனை வெளிப்படுத்தாதது பின்னடைவாக உள்ளது. இந்த விஷயத்தில் அந்த அணி கூடுதல் கவனம் செலுத்தக்கூடும்.
அணிகள் விவரம்:
கிங்ஸ் லெவன் பஞ்சாப்:
கிளென் மேக்ஸ்வெல்(கேப்டன்), டேவிட் மில்லர், மனன்வோரா, அக் ஷர் படேல், குர்கீரத் சிங், அனுரீத் சிங், சந்தீப் சர்மா, ஷான்மார்ஷ், விருத்திமான் சாஹா, நிகில் நாயக், மோகித் சர்மா, மார்க்ஸ்ஸ்டோனிஸ், கே.சி.கரியப்பா, அர்மான் ஜாபர், பிரதீப் ஷாகு, ஸ்வப்னில்சிங், ஹசிம் ஆம்லா, மோர்கன், ராகுவல் டிவாட்டியா, நடராஜன், மேட்ஹென்றி, வருண் ஆரோன், மார்ட்டின் குப்தில், டேரன் சமி, ரிங்கு சிங்.
கொல்கத்தா நைட் ரைடர்ஸ்:
கவுதம் காம்பீர் (கேப்டன்), டிரென்ட் போல்ட், டேரன் பிராவோ, பியூஸ் சாவ்லா, நாதன் கவுல்டர் நைல், ரிஷி தவண், சயன் கோஷ், செஷல்டன் ஜேக்சன், இஷாங்க் ஜக்கி, குல்தீப் யாதவ், கிறிஸ் லைன், சுனில் நரேன், மணீஷ் பாண்டே, யூசுப் பதான், ரோவ்மான் பொவல், அங்கித் ராஜ்புத், சஞ்ஜெய் யாதவ், ஷாகிப் அல் ஹசன், ராபின் உத்தப்பா, கிறிஸ் வோக்ஸ், சூர்ய குமார் யாதவ், உமேஷ் யாதவ்.
இடம்: மொகாலி
நேரம்: இரவு 8
நேரடி ஒளிபரப்பு: சோனி சிக்ஸ்