இந்தோனேஷிய ஓபன் பாட்மிண்டன்: 2-வது சுற்றுக்கு சாய்னா, பி.வி.சிந்து முன்னேற்றம்

இந்தோனேஷிய ஓபன் பாட்மிண்டனில் இந்தியாவின் சாய்னா நெவால், பி.வி.சிந்து 2-வது சுற்றுக்கு முன்னேறினர்.

இந்தோனேஷியாவின் ஜகார்த்தா நகரில் நடைபெற்று வரும் இந்த தொடரில் மகளிர் ஒற்றையர் பிரிவு முதல் சுற்று ஆட்டத்தில் 12-ம் நிலை வீராங்கனையான சாய்னா நெவால், போட்டி தரவரிசையில் 8-ம் நிலை வீராங்கனையான தாய்லாந்தின் ரட்சனோக் இன்ட னானை எதிர்த்து விளையாடினார்.

இதில் சாய்னா முதல் செட்டில் 10-4 என முன்னிலை வகித்தார். ஆனால் இன்டனான் வலுவாக மீண்டெழுந்து இந்த செட்டை 21-17 என கைப்பற்றினார்.

2-வது செட்டில் சாய்னாவுக்கு 16-15 என மிக நெருக்கமாக இன்டனான் நெருக்கடி கொடுத்தார். எனினும் சாய்னா சீராக புள்ளிகள் சேர்த்து இந்த செட்டை 21-18 என கைப்பற்றினார். வெற்றியை தீர்மானித்த கடைசி செட்டில் சாய்னா ஆதிக்கம் செலுத்த இந்த செட் 21-12 என அவர் வசமானது.

முடிவில் சாய்னா 17-21, 21-18, 21-12 என்ற செட் கணக்கில் வெற்றி பெற்றார். இந்த ஆட்டம் 57 நிமிடங்கள் நடைபெற்றது. மற்றொரு ஆட்டத்தில் உலக தரவரிசையில் 5-வது இடத்தில் உள்ள இந்தியாவின் பி.வி.சிந்து 21-12, 21-19 என்ற நேர் செட்டில் 31-ம் நிலை வீராங்கனையான தாய்லாந்தின் சோசூவாங்கை எளிதாக வீழ்த்தி 2-வது சுற்றுக்கு முன்னேறினார்.

கலப்பு இரட்டையர் பிரிவு முதல் சுற்றில் இந்தியாவின் அஸ்வினி பொன்னப்பா, சுமித் ரெட்டி ஜோடி 12-21, 9-21 என்ற நேர் செட்டில் இந்தோனேஷியாவின் இர்பான் பாத்ஹிலாஹ், வெனி அங்ராயினி ஜோடியிடம் தோல்வியடைந்தது. இந்த ஆட்டம் வெறும் 29 நிமிடங்களில் முடிவுக்கு வந்தது.