வேல்ஸ் அணியை வீழ்த்தியது இங்கிலாந்து

யூரோ கால்பந்து தொடரில் நேற்று மாலை பி பிரிவில் நடைபெற்ற ஆட்டத்தில் இங்கிலாந்து-வேல்ஸ் அணிகள் மோதின. ஆட்டத்தின் 42-வது நிமிடத்தில் வேல்ஸ் முதல் கோலை அடித்தது. ஃப்ரீகிக் மூலம் இந்த கோலை கரேத் பேல் அடித்தார். இதனால் முதல் பாதியில் வேல்ஸ் 1-0 என முன்னிலை வகித்தது.

இரண்டாவது பாதி ஆட்டம் தொடங்கிய 11-வது நிமிடத்தில் இங்கிலாந்து பதில் கோல் அடித்தது. கோல் கம்பத்துக்கு மிக அருகே வைத்து இந்த கோலை வார்டி அடிக்க ஆட்டம் 1-1 என சமநிலையை எட்டியது. 90 நிமிடங்கள் முடிவடைந்த நிலையில் கூடுதலாக 3 நிமிடங்கள் வழங்கப்பட்டது.

இதில் 2-வது நிமிடத்தில் இங்கிலாந்து வீரர் ஸ்டுரிட்ஜ் கோல் அடிக்க முடிவில் 2-1 என்ற கோல் கணக்கில் இங்கிலாந்து வெற்றி பெற்றது. இந்த தொடரில் இங்கிலாந்துக்கு இது முதல் வெற்றியாகும். முதல் ஆட்டத்தில் அந்த அணி ரஷ்யாவுடன் டிரா செய்திருந்தது.