இந்தியா - நியூஸி. போட்டி மழையால் கைவிடப்பட்டது: இங்கிலாந்தைப் பின்னுக்குத் தள்ளி இந்தியா 3வது இடத்துக்கு முன்னேற்றம்

நாட்டிங்கம் மைதானத்தில்  நடைபெறவிருந்த இந்தியா-நியூஸிலாந்து உலகக்கோப்பை 18வது போட்டி டாஸ் போடாமலேயே கைவிடப்பட்டது. நியூஸிலாந்து 7 புள்ளிகளுடன் முதலிடத்தில் உள்ளது, இந்திய அணி ஒரு புள்ளி கூடுதலாகப் பெற்று 5 புள்ளிகளுடன் இங்கிலாந்தைப் பின்னுக்குத் தள்ளி 3ம் இடத்துக்கு முன்னேறியுள்ளது.

ஆஸ்திரேலியா அணி 4 போட்டிகளில் 3 வெற்றி ஒரு தோல்வியுடன் 2ம் இடம் வகிக்கிறது.

இந்த உலகக்கோப்பைத் தொடரில் இதுவரை ஆஸ்திரேலியா, ஆப்கானிஸ்தான், இங்கிலாந்து அணிகள் மழை முடிவுகளிலிருந்து தப்பித்த அணிகளாகிறது.

“சூரிய வெளிச்சத்தை பார்த்து 4 நாட்கள் ஆகிறது, எனவே இது எங்களுக்கு ஒன்றும் ஆச்சரியமாகப்படவில்லை” என்கிறார் நியூஸிலாந்து கேப்டன் கேன் வில்லியம்சன்.

நியூஸிலாந்தும், இந்தியாவும் இன்னும் போட்டியைத் தோற்கவில்லை.

இதுவரை தென் ஆப்பிரிக்கா - வெஸ்ட் இண்டீஸ், இலங்கை-பாகிஸ்தான்,  இலங்கை-பங்களாதேஷ் போட்டிகள் வாஷ் அவுட் ஆகியுள்ளன. இன்று இந்தப் பட்டியலில் இந்தியா-நியூசிலாந்து போட்டியும் இணைந்துள்ளது.

ஒவ்வொரு போட்டிக்கும் இன்னொரு கூடுதல் நாள் வைப்பது போட்டித் தொடரின் நீளத்தை அதிகரிக்கும் மேலும் ஒவ்வொரு போட்டியையுமே மறுநாள் நடத்துவது என்பது நடைமுறை சாத்தியம் இல்லாதது என்று ஐசிசி தெரிவித்துள்ளது.