ஜூனியர் சூப்பர் கிங்ஸ் (ஜேஎஸ்கே) கோப்பைக்கான டி20 கிரிக்கெட் போட்டியில் திருப்பூர் பிளாட்டோஸ், மதுரை லீ சேட்லியர் அணிகள் வெற்றி கண்டன.
முத்தூட் நிறுவனம் மற்றும் தமிழ்நாடு கிரிக்கெட் சங்கம் ஆதரவுடன் பள்ளிகள் இடையிலான ஜூனியர் சூப்பர் கிங்ஸ் (ஜேஎஸ்கே) கோப்பைக்கான டி20 கிரிக்கெட் தொடரின் 2-வது கட்டப் போட்டிகள் திருநெல்வேலியில் நடைபெற்று வருகின்றன.
இதில் நேற்று நடைபெற்ற ஆட்டத்தில் சென்னை செயின்ட் பீட்ஸ் ஏஐஎச்எஸ்எஸ் அணி 3 ரன்கள் வித்தியாசத்தில் கோவை ஸ்ரீஜெயேந்திர சரஸ்வதி எம்எச்எஸ்எஸ் அணியை வீழ்த்தியது. முதலில் ஆடிய செயின்ட் பீட்ஸ் அணி 19.4 ஓவர்களில் 126 ரன்களுக்கு ஆட்டமிழந்தது. பின்னர் விளையாடிய கோவை ஸ்ரீஜெயேந்திர சரஸ்வதி பள்ளி அணி 20 ஓவர்களில் 4 விக்கெட்கள் இழப்புக்கு 123 ரன்கள் எடுத்து தோல்வி கண்டது.
மற்றொரு ஆட்டத்தில் சென்னை சாந்தோம் எச்எஸ்எஸ் அணி 61 ரன்கள் வித்தியாசத்தில் திருச்சி ஸ்ரீரங்கம் பாய்ஸ் பள்ளி அணியை வென்றது. முதலில் விளையாடிய சாந்தோம் அணி 20 ஓவர்களில் 9 விக்கெட்கள் இழப்புக்கு 147 ரன்கள் எடுத்தது. பின்னர் விளையாடிய ஸ்ரீரங்கம் பாய்ஸ் அணி 20 ஓவர்களில் 7 விக்கெட்கள் இழப்புக்கு 86 ரன்கள் எடுத்து தோல்வியைச் சந்தித்தது.
3-வது ஆட்டத்தில் திருப்பூர் பிளாட்டோஸ் அகாடமி அணி 59 ரன்கள் வித்தியாசத்தில் சேலம் நீலாம்பாள் சுப்பிரமணியம் எச்எஸ்எஸ் அணியை வென்றது. முதலில் களமிறங்கிய திருப்பூர் பிளாட்டோஸ் அணி 20 ஓவர்களில் 4 விக்கெட்கள் இழப்புக்கு 150 ரன்கள் குவித்தது. பின்னர் விளையாடிய நீலாம்பாள் சுப்பிரமணியம் அணி 15.3 ஓவர்களில் 91 ரன்களுக்குச் சுருண்டது.
4-வது ஆட்டத்தில் மதுரை லீ சேட்லியர் அணி 8 விக்கெட்கள் வித்தியாசத்தில் வேலூர் கன்கார்டியா எச்எஸ்எஸ் பள்ளியைத் தோற்கடித்தது. முதலில் களம்புகுந்த வேலூர் கன்கார்டியா பள்ளி அணி 20 ஓவர்களில் 8 விக்கெட்கள் இழப்புக்கு 116 ரன்கள் எடுத்தது. இதைத் தொடர்ந்து ஆடிய லீ சேட்லியர் அணி 15 ஓவர்களில் 2 விக்கெட்கள் இழப்புக்கு 118 ரன்கள் சேர்த்து வெற்றி கண்டது.
