தேசிய கடற்கரை வாலிபால்: தமிழ்நாடு பெண்கள் அணி சாம்பியன்

நாகப்பட்டினத்தில் நடைபெற்ற தேசிய அளவிலான கடற்கரை வாலிபால் போட்டியின் பெண்கள் பிரிவில், தமிழ்நாடு அணி ஒட்டுமொத்த சாம்பியன் கோப்பையை வென்றது.

தேசிய அளவில் பள்ளி மாணவர்களுக்கான 64-வதுகடற்கரை வாலிபால் போட்டிகள் நாகப்பட்டினம் புதிய கடற்கரையில் கடந்த மாதம் 27-ம்தேதி தொடங்கின. இந்திய பள்ளிகள் விளையாட்டு குழுமம் சார்பில் ஆண்கள், பெண்கள் என இருவருக்கும் 14, 17, 19 வயதுக்குட்பட்ட 3 பிரிவுகளின் கீழ் நடைபெற்றது.

4 நாட்கள் நடைபெற்ற இப்போட்டியின் இறுதிப் போட்டிகள் நேற்று முன்தினம் மாலை நடைபெற்றது. இதில் 14 வயதுக்குட்பட்டோருக்கான போட்டியில் ஆண்கள் பிரிவில் டெல்லி அணி முதலிடத்தையும், தமிழ்நாடு அணி 2-ம் இடத்தையும், குஜராத் அணி 3-ம் இடத்தையும் பெற்றன. பெண்கள் பிரிவில், தமிழ்நாடு அணி முதலிடத்தையும், குஜராத் அணி 2-ம் இடத்தையும் பிடித்தன.

17 வயதுக்குட்பட்டோருக்கான போட்டியில் ஆண்கள் பிரிவில் தமிழ்நாடு அணி முதலிடத்தையும், ஒடிசா அணி 2-ம் இடத்தையும், டெல்லி அணி 3-ம் இடத்தையும் பிடித்தன. பெண்கள் பிரிவில் தமிழ்நாடு அணி முதலிடத்தையும். கோவா அணி 2-ம் இடத்தையும் பிடித்தன.

19 வயதுக்குட்பட்டோருக்கான போட்டியில் ஆண்கள் பிரிவில் டெல்லி அணி முதலிடத்தையும், தமிழ்நாடு அணி 2-ம் இடத்தையும், கோவா அணி 3-ம் இடத்தையும் பிடித்தன. பெண்கள் பிரிவில் தமிழ்நாடு அணி முதலிடத்தையும், தெலங்கானா அணி 2-ம் இடத்தையும் பிடித்தன.

பெண்களுக்கான போட்டிகளில் 3 பிரிவுகளிலும் முதலிடத்தைப் பிடித்து தமிழ்நாடு அணி ஒட்டுமொத்த சாம்பியன் கோப்பையை வென்றது.

நேற்று முன்தினம் மாலையில் நடைபெற்ற பரிசளிப்பு விழாவில் மாவட்ட ஆட்சியர் சுரேஷ்குமார், வெற்றி பெற்ற அணிகளுக்கு கோப்பைகளை வழங்கினார்.