‘முந்தும்’ ஐபிஎல் அணிகளின் பிளே-ஆஃப் வாய்ப்பு எப்படி? - ஒரு விரைவுப் பார்வை

சென்னை: நடப்பு ஐபிஎல் சீசனில் 50 லீக் ஆட்டங்கள் நடந்து முடிந்துள்ளன. இன்னும் 20 லீக் ஆட்டங்கள் நடைபெற உள்ளது. இந்நிலையில், ஐபிஎல் அணிகளின் பிளே-ஆஃப் வாய்ப்பு எப்படி உள்ளது என்பதை பார்ப்போம்.

நடப்பு சீசனில் சிஎஸ்கே மற்றும் ராஜஸ்தான் ராயல்ஸ் அணிகள் முதல் சுற்றோடு வெளியேறி உள்ளன. எஞ்சியுள்ள 8 அணிகள் பிளே-ஆஃப் வாய்ப்புக்கான ரேஸில் உள்ளன. இருந்தாலும் புள்ளிப்பட்டியலில் டாப் 4 இடங்களை பிடிக்கின்ற அணிகள் தான் அடுத்த சுற்றுக்கு முன்னேற முடியும்.

மும்பை இந்தியன்ஸ்: நடப்பு சீசனில் ஹர்திக் பாண்டியா தலைமையிலான மும்பை இந்தியன்ஸ் அணி 11 ஆட்டங்களில் 7 வெற்றிகளை பெற்றுள்ளது. தொடர்ச்சியாக 6 ஆட்டங்களில் வென்று புள்ளிப் பட்டியலில் முதல் இடத்தில் உள்ளது. அந்த அணிக்கு எஞ்சியுள்ள 3 ஆட்டங்களில் ஒரு வெற்றி பெற்றால் கூட பிளே-ஆஃப் சுற்றுக்கு முன்னேறிவிடும். அந்த அணி சிறந்த நெட் ரன் ரேட் கொண்டுள்ள காரணத்தால் டாப் 4 அணிகளில் ஒன்றாக இடம்பெறும் வாய்ப்பு உள்ளது.

ராயல் சாலஞ்சர்ஸ் பெங்களூரு: 10 ஆட்டங்களில் விளையாடி 14 புள்ளிகளை பெற்றுள்ளது ஆர்சிபி. அந்த அணி எஞ்சியுள்ள 4 ஆட்டங்களில் 3 வெற்றிகளை பெற்றால் 20 புள்ளிகளுடன் எந்த அணியையும் சார்ந்திருக்காமல் நேரடியாக பிளே-ஆஃப் சுற்றுக்கு முன்னேறும். அப்படி இல்லாத சூழலில் மற்ற அணிகளை சார்ந்திருக்க வேண்டும். எப்படியும் ஆர்சிபி பிளே-ஆஃப் சுற்றுக்கும் முன்னேறும் என எதிர்பார்க்கப்படுகிறது.

பஞ்சாப் கிங்ஸ்: 2014-ம் ஆண்டு சீசனுக்கு பிறகு பஞ்சாப் கிங்ஸ் அணியின் பிளே-ஆஃப் வாய்ப்பு பிரகாசமாக உள்ளது. தற்போது 13 புள்ளிகளுடன் புள்ளிப்பட்டியலில் மூன்றாவது இடத்தில் உள்ளது. அந்த அணி விளையாட உள்ள கடைசி 4 ஆட்டங்களில் 3 வெற்றிகளை பெற்றால் எளிதில் பிளே-ஆஃப் சென்று விடும். அப்படி இல்லாத நிலையில் பிற அணிகளின் வெற்றி தோல்விகளை பொறுத்து அது முடிவாகும்.

குஜராத் டைட்டன்ஸ்: 9 ஆட்டங்களில் 6 வெற்றிகளை பெற்றுள்ளது குஜராத் அணி. அந்த அணிக்கு இன்னும் 5 ஆட்டங்கள் உள்ளன. அதில் மூன்றில் வெற்றி பெற்றால் பிளே-ஆஃப் வாய்ப்பு சுலபம். மூன்று ஆட்டங்களில் வெற்றி பெற்றால் 18 புள்ளிகளை பெற்று பிளே-ஆஃப் சுற்றுக்கு குஜராத் முன்னேறும்.

டெல்லி கேபிட்டல்ஸ்: இந்த சீசனின் தொடக்கத்தில் வெற்றிகளை குவித்தது டெல்லி அணி. இருப்பினும் கடைசியாக விளையாடிய 4 ஆட்டங்களில் மூன்றில் தோல்வி கண்டுள்ளது. தற்போது புள்ளிப் பட்டியலில் 5-வது இடத்தில் உள்ள டெல்லி அணி, எஞ்சியுள்ள 4 ஆட்டங்களில் வெற்றி பெற்றால் நேரடியாக பிளே-ஆஃப் சுற்றுக்கு முன்னேறும். மூன்றில் வெற்றி பெற்றால் பிற அணிகளின் முடிவுகள் டெல்லிக்கு சாதகமாக அமைய வேண்டும்.

லக்னோ சூப்பர் ஜெயன்ட்ஸ்: 10 புள்ளிகளுடன் புள்ளிப் பட்டியலில் தற்போது 6-வது இடத்தில் உள்ளது. அந்த அணி பிளே-ஆஃப் சுற்றுக்கு முன்னேற நிச்சயமாக 4 ஆட்டங்களிலும் வென்றாக வேண்டும். அதோடு ரன் ரேட், மற்ற அணிகளின் முடிவுகளும் லக்னோவுக்கு சாதகமாக அமைய வேண்டும்.

கொல்கத்தா நைட் ரைடர்ஸ்: நடப்பு சாம்பியனான கொல்கத்தா அணி பத்து ஆட்டங்களில் 9 புள்ளிகள் பெற்றுள்ளது. எஞ்சியுள்ள 4 ஆட்டங்களில் கொல்கத்தா வெற்றி பெற்றாலும் 17 புள்ளிகள் வரை பெற முடியும். இருந்தாலும் மற்ற அணிகளின் முடிவுகளை பொறுத்தே கொல்கத்தாவின் பிளே-ஆஃப் வாய்ப்பு அமையும்.

சன்ரைசர்ஸ் ஹைதராபாத்: இந்த சீசனின் தொடக்கத்துக்கு முன்பாக ஹைதராபாத் அணி பிளே-ஆஃப் சுற்றுக்கு முன்னேறும் என முன்னாள் கிரிக்கெட் வீரர்கள், கிரிக்கெட் வல்லுநர்கள் சொல்லி இருந்தார். அந்த அணி 9 ஆட்டங்களில் விளையாடி 6 புள்ளிகளை பெற்று, புள்ளிப்பட்டியலில் 9-வது இடத்தில் உள்ளது. எஞ்சியுள்ள 5 ஆட்டங்களில் வெற்றி பெற்றாலும் 16 புள்ளிகள் பெற முடியும். ரன் ரேட் அடிப்படையில் பிளே-ஆஃப் சுற்றுக்கு முன்னேற 14 புள்ளிகள் போதும். இருப்பினும் பிற அணிகளின் முடிவை பொறுத்தே அது அமையும். இருப்பினும் எஞ்சியுள்ள ஆட்டங்களில் இரண்டு தோல்வியை தழுவினாலும் ஹைதராபாத் முதல் சுற்றோடு வெளியேற வேண்டும்.