இன்ஸ்டாகிராமில் படம் வெளியீடு: ரூ.82 லட்சம் அள்ளிய  கோலி

இந்திய கிரிக்கெட் அணியின் கேப்டன் விராட் கோலி,  சமூக வலைதளங்களில் தனது கருத்துகள், படங்களைப் பதிவு செய்து ரசிகர்களை வெகுவாகக் கவர்ந்து வருகிறார்.  இந்நிலையில் ஹோப்பர் ஹெச்கியூ டாட் காம் என்ற இணையதளம், இன்ஸ்டாகிராமில் இருக்கும் நட்சத்திரங்களின் கணக்கு, பின்பற்றுபவர்கள், அவர்களின் பதிவுகள், அதற்கான கால இடைவெளி என பலமுனைகளில் அலசி ஆராய்ந்து சில தகவல்களை வெளியிட்டுள்ளது.

இதில்  இன்ஸ்டாகிராம் பக்கத்தில், ஒரு போஸ்டிற்காக நட்சத்திரங்கள் எவ்வளவு சம்பாதிக்கிறார்கள் என்பது குறித்த தகவலையும் ஹோப்பர் ஹெச்கியூ தெரிவித்துள்ளது.

இந்த பட்டியலில் சர்வதேச அளவில் இந்திய கிரிக்கெட் அணியின் கேப்டன் விராட் கோலி 17-வது இடத்தைப் பெற்றுள்ளார்.

தன்னை பின்தொடர்பவர்களின் எண்ணிக்கையை சுமார் 2.3 கோடியை  கொண்டுள்ள விராட் கோலி, ஒரு விளம்பர பதிவுக்காக ரூ.82.45 லட்சம் வரை வருவாய் ஈட்டுவது கண்டறியப்பட்டுள்ளது. இந்தப் பட்டியலில் முதலிடத்தில் அமெரிக்காவின் மாடல் அழகியும், செய்தி தொகுப்பாளருமான கெய்லி ஜென்னர் உள்ளார். 

இரண்டாவது இடத்தை நடிகையும் பாடகியுமான செலீனா கோம்ஸும், மூன்றாவது இடத்தை போர்ச்சுக்கல் கால்பந்து அணியின் கேப்டன் கிறிஸ்டியானோ ரொனால்டோவும் பெற்றுள்ளனர். விளையாட்டு வீரர்கள் வரிசையில் கணக்கிட்டால் விராட் கோலி 9-வது இடத்தில் உள்ளார்.