சென்னை: ஐபிஎல் போட்டிகளில் சென்னை சூப்பர் கிங்ஸ் (சிஎஸ்கே) அணிக்காக விளையாடி வரும் மதிஷா பதிரனா காயம் காரணமாக அணியிலிருந்து விலகியுள்ளார்.
17-வது ஐபிஎல் தொடரில் நடப்பு சாம்பியன் சென்னை சூப்பர் கிங்ஸ் அணி 11 போட்டிகளில் விளையாடி 6 வெற்றியும், 5 தோல்விகளையும் பதிவு செய்துள்ளது.
சிஎஸ்கே அணிக்காக இலங்கையை சேர்ந்த இளம் வீரர் மதிஷா பதிரனா விளையாடி வந்தார். இந்த சீசனில் 6 போட்டிகளில் விளையாடி 13 விக்கெட்டுகளையும் அவர் சாய்த்திருந்தார்.
இதனிடையே காயம் காரணமாக சில போட்டிகளை தவறவிட்ட அவர், சிஎஸ்கே விளையாடிய கடந்த 2 ஆட்டங்களிலும் பங்கேற்கவில்லை. இந்நிலையில் தசைநார் முறிவு சிகிச்சை பெறுவதற்காக அவர் இலங்கை சென்றுள்ளார்.
சிகிச்சை முடிந்தபிறகு அவர் ஓய்வில் இருக்க வேண்டும் என மருத்துவர்கள் அறிவுறுத்தியுள்ளனர். இதனால் இவர் நடப்பு சீசனின் எஞ்சிய போட்டிகளில் விளையாட மாட்டார் என தெரியவந்துள்ளது.