சென்னை கிராண்ட் மாஸ்டர்ஸ் செஸ் | குகேஷ் - அர்ஜுன் எரிகைசி ஆட்டம் டிரா

சென்னை: தமிழ்நாடு விளையாட்டு மேம்பாட்டு ஆணையம் சார்பில் ‘சென்னை கிராண்ட் மாஸ்டர்ஸ் செஸ் சாம்பியன்ஷிப்’ போட்டி சென்னையில் நடைபெற்று வருகிறது. தொடரின் 2-வது நாளான நேற்று 2-வதுசுற்று ஆட்டங்கள் நடைபெற்றன. இதன் ஒரு ஆட்டத்தில் இந்திய கிராண்ட் மாஸ்டர்களான டி.குகேஷ்- அர்ஜுன் எரிகைசி மோதினார்கள். குகேஷ் வெள்ளை நிற காய்களுடனும், அர்ஜுன் எரிகைசி கருப்பு நிற காய்களுடனும் களமிறங்கினார்கள்.

இந்த ஆட்டம் 32-வது நகர்த்தலின் போது டிராவில் முடிவடைந்தது. இதனால் இருவருக்கும் தலா 0.5 புள்ளிகள் வழங்கப்பட்டது. குகேஷ் தனது முதல் சுற்று ஆட்டத்தையும் டிராவில் முடித்திருந்தார். அதேவேளையில் அர்ஜுன் எரிகைசி தனது முதல் சுற்றில் ஹரி கிருஷ்ணாவிடம் தோல்வியை சந்தித்துஇருந்தார். இந்திய கிராண்ட் மாஸ்டரான பி.ஹரிகிருஷ்ணா தனது 2-வது சுற்றில் செர்பியாவின் அலெக்சாண்டர் ப்ரெட்கேவுடன் மோதினார். இந்த ஆட்டம் 69-வது காய் நகர்த்தலின் போது டிரா ஆனது.

உக்ரைனின் பாவெல் எல்ஜனோவ், ஹங்கேரியின் சனான் சுகிரோவுடன் மோதினார். இதில் கருப்பு நிற காய்களுடன் விளையாடிய சனான் சுகிரோவ் 63-வது காய் நகர்த்தலின் போது வெற்றி பெற்றார். அமெரிக்காவின் லெவோன் அரோனியன், ஈரானின் பர்ஹாம் மக்சூட்லூ மோதிய ஆட்டம் 31-வது காய் நகர்த்தலின் போது டிராவில் முடிவடைந்தது.

2-வது சுற்றின் முடிவில் சனான் சுகிரோவ், ஹரிகிருஷ்ணா ஆகியோர் தலா 1.5 புள்ளிகளுடன் முதல் இரு இடங்களில் உள்ளனர். அலெக்சாண்டர் ப்ரெட்கே, லெவோன் அரோனியன், டி.குகேஷ், பாவெல் எல்ஜனோவ் ஆகியோர் தலா ஒரு புள்ளிகளுடன் 3 முதல் 6-வது இடங்களில் உள்ளனர்.

பர்ஹாம் மக்சூட்லூ, அர்ஜுன் எரிகைசி ஆகியோர் தலா 0.5 புள்ளிகளுடன் முறையே 7 மற்றும் 8-வதுஇடம் வகிக்கின்றனர். இன்று 3-வது சுற்று ஆட்டங்கள் நடைபெறுகின்றன. இதில் குகேஷ் - பர்ஹாம் மக்சூட்லூ, லெவோன் அரோனியன் - சனான் சுகிரோவ், ஹரிகிருஷ்ணா - பாவெல் எல்ஜனோவ், அர்ஜுன் எரிகைசி - அலெக்சாண்டர் ப்ரெட்கே மோதுகின்றனர்.