பிசிசிஐ பொது மேலாளராக சபா கரீம் நியமனம்

இந்திய கிரிக்கெட் கட்டுப்பாட்டு வாரியத்தின் (பிசிசிஐ) பொது மேலாளராக (கிரிக்கெட் செயல்பாடு) இந்திய அணியின் முன்னாள் விக்கெட் கீப்பர் சபா கரீம் நியமனம் செய்யப்பட்டுள்ளார்.

வரும் ஜனவரி 1-ம் தேதி இந்த புதிய பொறுப்பை சபா கரீம் ஏற்கவுள்ளார். பிசிசிஐ தலைமைச் செயல் அதிகாரி ராகுல் ஜோரியின் கீழ் சபா கரீம் செயல்படுவார். கிரிக்கெட் கட்டுப்பாட்டு வாரியத்தின் செயல்பாடுகள், எதிர்காலத் திட்டங்களைச் செயலாற்ற ஜோரிக்கு உதவியாக கரீம் இருப்பார் . பிசிசிஐ பொது மேலாளர் பதவி கடந்த செப்டம்பர் முதல் காலியாக இருந்தது. பொது மேலாளராக இருந்த ஸ்ரீதர் கடந்த அக்டோபரில் பதவி விலகினார். இதைத் தொடர்ந்தே கரீமுக்கு இந்தப் பதவி வழங்கப்பட்டுள்ளது. இந்தத் தகவலை பிசிசிஐ வெளியிட்டுள்ள செய்திக்குறிப்பில் தெரிவித்துள்ளது.